Díli, 15 Outubru 2026 – Ministériu Edukasaun, liuhosi Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál (ESJ-ESTV), Sr. Domingos Lopes Lemos, hamutuk ho Sekretáriu Estadu ba Formasaun Profisionál no Empregu (SEFOPE), asina Memorandu Entendimentu (MoU) hodi reforsa kooperasaun iha área formasaun tékniku-profisionál, otimiza rekursu no aumenta oportunidade empregu ba graduadu sira, liuhosi programa estájiu nasionál no mobilidade laborál internasionál.
Iha intervensaun, Sua Exelénsia Sekretáriu Estadu Domingos Lopes Lemos subliña katak kooperasaun interministeriál ne’e importante atu hametin ligasaun entre sistema edukasaun no nesesidade merkadu traballu, hodi prepara foin-sa’e sira ho kompeténsia ne’ebé relevante ba dezenvolvimentu ekonómiku Timor-Leste nian.
Akordu ne’e define prioridade haat: armonizasaun kurríkulu no kualifikasaun ho Sistema Nasionál Kualifikasaun (SNK), ho apoiu INDMO, I.P.; kriasaun Sentru Lian Pilotu ba Serbisu iha instalasaun Ensinu Sekundáriu Públiku Tékniku-Vokasionál (ESTVP) Becora; fasilitasaun asesu ba programa estájiu nasionál no mobilidade laborál internasionál ba finalista sira; no dezenvolvimentu orientasaun karreira, feira profisaun no inisiativa autoempregu ba juventude.
Iha oportunidade ne’e, Sekretáriu Estadu apela ba diretór eskola, profesór no formadór sira atu hametin ensinu tékniku-vokasionál, nu’udar dalan importante ida hodi dezenvolve kompeténsia, aumenta produtividade no prepara juventude timoroan atu responde ba nesesidade merkadu traballu, iha nivel nasionál no internasionál.
