Atividade

Ministériu Edukasaun realiza kompetisaun Nasionál Edukativa, Intelijente no inovadora (KNEII) ba 3º siklu Ensinu Báziku no Ensinu Sekundáriu Jerál Públiku

Liquiçá, 09 Novembro 2026 – Ministeriu Edukasaun liuhusi Diretora Nasionál Ensinu Báziku Sra. Estelita Soares hamutuk ho Vise Prezidente GPDMA (Gabinete Peskiza Dezenvolvimentu Monitorizasaun no Avaliasaun, INFORDEPE, Sr. Sebastião de Oliveira halo Abertura ba Kompetisaun Nasionál Edukativa, Intelijente no Inovadora (KNEII) ba 3° Siklu Ensinu Báziku no Ensinu Sekundáriu Jerál Públiku iha Eskola Sekundáriu Jeral (ESJ) Hu Iso Lara Iso Liquicá. Postu administrativu Liquicá, Munisípiu Liquicá.

Kompetisaun ne’e sai nu’udar plataforma ida atu fó oportunidade ba estudante sira hodi hatudu sira-nia koñesimentu, abilidade, kriatividade no kapasidade inovadora liuhusi kompetisaun edukativa.

Iha intervensaun Diretora Nasionál Ensinu Báziku Sra. Estelita Soares hatete katak Kompetisaun KNEII 2026 mak atividade edukativa ne’ebé organiza hodi promove kompetisaun saudavel, aumenta kapasidade entre estudante sira husi Ensinu Báziku no Ensinu Sekundáriu Jerál Públiku.

“Kompetisaun Nasional Edukativa, Intelijente no Inovadora 2026 (KNEII 2026) mak atividade edukativa ne’ebe organiza ho objetivu atu promove kultura kompetisaun saudavel, dezenvolve kapasidade inteletuál, hanoin krítiku, kriatividade, inovasaun no kooperasaun entre alunu sira.

Kompetisaun ne’e envolve alunu sira husi Ensinu Báziku no Ensinu Sekundariu Jerál Publiku, no hala’o liuhusi faze kompetisaun oioin, hodi fó oportunidade ba alunu sira atu hatudu sira-nia koñesimentu, abilidade no kapasidade iha área aprendizajen ida-idak.” Dehan Diretora Nasionál Ensinu Báziku.

Entretantu tuir Vise Prezidente GPDMA, INFORDEPE, Sr. Sebastião de Oliveira haktuir katak Edukasaun la’os memoriza de’it, maibé komprende, hanoin kritiku, kriatividade no aplika koñesimentu hodi rezolve problema iha sosiedade.

“Importante atu ita hanoin nafatin katak valór loos husi edukasaun la’ós de’it haree husi kuantidade koñesimentu ne’ebé ita konsege memoriza, maibé mós haree husi ita-nia kapasidade atu komprende, husu pergunta, analiza ho hanoin kritiku no aplika koñesimentu hirak-ne’e hodi buka solusaun ba dezafiu sira iha sosiedade”. Salienta Vise Prezidente GPDMA.

Inisiativa ida-ne’e mós sai motivasaun ba estudante sira atu kontinua aprende, kolabora no buka solusaun kriativa, hodi kontribui ba dezenvolvimentu kualidade edukasaun no harii futuru Timor-Leste ne’ebé di’ak liután.