Díli – Loron Sexta-Feira, 22 Novembru 2024
Ministériu Edukasaun liuhusi Diresaun Nasionál Rekursu Humanu (DNRH), relata andamentu prosesu pagamentu saláriu, subsidiu kolokasaun no transporte ba profesór foun bolsa kandidatu nian ne’ebé koloka iha etapa dahuluk, daruak no datoluk iha tinan 2024, iha Salaun VIP Ministériu Edukasaun, Vila-Verde.
Iha komunikadu imprensa ne’e, Diretora Nasionál Rekursu Umanu, Sra. Anita Tavares Ribeiru de Jesus, hateten, kolokasaun faze dahuluk no daruak husi prosesu bolsa kandidatu dahuluk, konsege halo pagamentu hotu, inklui saláriu kada fulan husi loron 14 fulan maiu. Subsidiu kolokasaun inisiál no transporte prosesa no halo ona pagamentu iha fulan novembru no osan tama ona ba idak-idak nia konta bankaria.
“Informa ba profesór sira husi kolokasaun dahuluk no daruak, karik saláriu no subsidiu seidauk tama iha konta bankaria, husu atu informa lalais mai ME-DNRH hodi haree tuir fali prosesu ne’e”, dehan Diretora Nasionál Rekursu Umanu.
Dirijente ne’e hatutan, ba profesór sira ne’ebé kolokadu iha etapa daruak, atu aselera prosesu submisaun lista prezensa kada fulan mai ME-DNRH, ne’ebé asinadu husi diretór eskola idak-idak (Eskola privadu, públiku no eskola P. CAFE).
Profesór kolokadu iha etapa datoluk, tenki mós apresa ho lista prezensa kada fulan, labele liu loron 15 fulan dezembru 2024. Pagamentu sei iha prosesu no sei tama iha fulan dezembru.
Pagamentu subsidiu kolokasaun inisiál no subsidiu transporte ba profesór bolsa kandidatu faze dahuluk, ho totál profesór na’in 443 no totál orsamentu jerál hamutuk $. 458,747.00. faze daruak nian profesór hamutuk na’in 665 no totál orsamentu jerál hamutuk $ 605, 762.00. Kolokasaun faze datoluk nian sei iha prosesu insersaun dokumentu iha SIGAP Komisaun Funsaun Públika (KFP).
Orsamentu husi kolokasaun faze dahuluk no daruak, totál saláriu baze hamutuk $ 1,132.00, totál subsidiu inisiál hamutuk $ 952,602.00, totál subsidiu transporte hamutuk $ 110,775.00, husi totál orsamentu ne’e hamutuk $ 1,063,377.00.
#MédiaME
