Díli – Loron Segunda-Feira, 25 Novembru 2024
Ministériu Edukasaun liuhusi Gabinete Inspesaun Jerál, fahe motorizada hamutuk 22 ba inspetór/a eskolár sira husi Ensinu Pré-Eskolár to’o Ensinu Sekundáriu Jerál no Ensinu Sekundáriu Tékniku Vokasionál, hodi fasilita sira halo inpesaun ba eskola sira ho di’ak no fasil liután iha terenu. Motorizada ne’e fahe iha Gabinete Inspesaun Jerál, Ministériu Edukasaun, Vila-Verde.
Iha ámbitu ne’e, Sub.Inspetór Jerál Ministériu Edukasaun nian, Sr. Rodolfo Aparício, hateten, ohin fahe motorizada ba inspetór/a eskolár sira, hodi uza ba halo fiskalizasaun no observasaun ba ensinu aprendizajen iha terenu.
“Motorizada hamutuk 22 ne’e fahe de’it mak 14 no 8 seidauk bele fahe, tanba inspetór eskolár sira balun seidauk iha karta kondusaun, tanba regra ba ema ne’ebé konduz trasporte, tenki iha karta kondusaun, tanba ne’e motorizada ita seidauk bele fahe, no haruka inspetór/a eskolár sira ba trata tiha karta kondusaun, hafoin bele mai foti motorizada refere”. Dehan Sub. Inspetór Jerál ME.
Inspetór/a eskolár sira ne’e husi Munisípiu Baucau, Viqueque, Ainaro Covalima, Liquiça, Bobonaro, Manufahi no Dili. Motrizada refere ho marka Verza hamutuk 18 no RevoX hamutuk 4.
Rekorda katak, antes ne’e Ministériu Edukasaun fahe ona motorizada hamutuk 83 ba inspetór/a eskolár sira iha territóriu laran tomak no balun ne’ebé seidauk hetan, ohin fahe hotu ona hodi bele fasilita sira nia servisu loron-loron iha terrenu.
#MédiaME
