Lautém, 24 Outubro 2026 — Sekretáriu Estadu ba Ensinu Sekundáriu Jerál no Ensinu Sekundáriu Tékniku-Vokasionál (ESJ-ESTV), Domingos Lopes Lemos, Lic. Ed., MM, partisipa iha serimónia lansamentu eskultura Lenuk Tasi no kampaña sensibilizasaun kona-ba Edukasaun ba Ekonomia Azùl, ne’ebé hala’o iha Munisípiu Lautém, iha Sábadu, no hetan partisipasaun besik ema na’in 500.
Iha ninia intervensaun, Sekretáriu Estadu hato’o apresiasaun ba Gabinete Fronteiras Terrestres no Marítimas (GFTM), ne’ebé lidera inisiativa ne’e iha koordenasaun ho Ministériu Edukasaun no Autoridade Munisípiu Lautém.
Nia esplika katak eskultura Lenuk Tasi ne’e parte husi kampaña sensibilizasaun kona-ba Ekonomia Azúl, ho objetivu atu hasa’e konxiénsia públika kona-ba protesaun ambiente tasi nian, jestaun lixu no utilizasaun rekursu naturál ho responsabilidade.
Eskultura ne’e mós sei sai fatin atu halibur botir plástiku mamuk, hodi promove prátika resiklajen no envolve estudante, joven no komunidade sira iha esforsu atu hamenus poluisaun plástiku iha tasi laran no tasi-ibun.
Sekretáriu Estadu apela ba estudante sira atu sai ajente mudansa iha protesaun ambiente. Nia enkoraja estudante Ensinu Báziku atu evita soe lixu arbiru, no estudante Ensinu Sekundáriu Jerál no Tékniku-Vokasionál atu dezenvolve kriatividade no espíritu empreendedór hodi transforma materiál plástiku sai produtu foun ho valór ekonómiku.
Nia subliña katak kada botir plástiku ne’ebé halibur no resikla reprezenta kontribuisaun ba konservasaun biodiversidade tasi nian no prezervasaun patrimóniu naturál Timor-Leste nian ba jerasaun sira tuirmai.
Inisiativa iha Lautém ne’e kontinua esforsu sensibilizasaun ambientál ne’ebé hahú ho lansamentu eskultura Ikan Azúl iha Díli, iha tinan 2024. Liuhusi kampaña ne’e, Governu promove komprensaun katak protesaun tasi no dezenvolvimentu Ekonomia Azúl nu’udar responsabilidade sidadaun hotu iha Timor-Leste.
Atu remata, Sekretáriu Estadu deklara ofisialmente eskultura Lenuk Tasi iha Munisípiu Lautém lansa ona no apela ba komunidade hotu atu hamutuk promove hahalok soe lixu ho responsabilidade no aumenta atividade resiklajen.
“Mai ita hamutuk: Soe lixu ho responsabilidade, resikla no salva tasi Lautém!”
