Dili, 26 Outubru 2026 — Sekretáriu Estadu ba Ensinu Sekundáriu Jerál no Ensinu Sekundáriu Tékniku-Vokasionál (ESJ-ESTV), Domingos Lopes Lemos, Lic. Ed., MM., partisipa iha Enkontru Koordenasaun Interministeriál da-5 no Enkontru ACNOC da-3, ne’ebé prezide hosi Primeiru-Ministru, Kay Rala Xanana Gusmão. Enkontru ne’e hala’o iha Salaun Nobre Ministériu Negósiu Estranjeiru no Kooperasaun (MNEK), iha Praia dos Coqueiros, iha segunda-feira, 26 Outubru 2026.
Enkontru ne’e nia objetivu mak atu avalia progresu integrasaun Timor-Leste nu’udar membru ASEAN, no analiza preparasaun sira ba Timor-Leste nia Prezidénsia ASEAN iha tinan 2029. Diskusaun sira foka mós ba desizaun no medida estratéjika ne’ebé presiza atu hametin kapasidade institusionál, dezenvolve infraestrutura no hadi’a kapasidade ekonómika no finanseira nasaun nian, hodi asegura preparasaun adekuada ba responsabilidade rejionál ne’e.
Partisipasaun Sekretáriu Estadu ESJ-ESTV iha enkontru ne’e reflete importánsia koordenasaun entre ministériu no instituisaun públika sira atu apoia prosesu integrasaun Timor-Leste ba ASEAN. Iha área edukasaun, preparasaun ne’e presiza inklui dezenvolvimentu rekursu umanu, hametin kapasidade institusionál no promove kooperasaun edukasionál ho nasaun membru ASEAN sira.
Depois enkontru remata, hala’o mós serimónia komemorativa ba aniversáriu dahuluk adezaun istórika Timor-Leste ba ASEAN, nu’udar marka importante ida iha prosesu integrasaun rejionál nasaun nian.
