Oe-Cusse, 30 Setembru 2026 — Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál (ESJ-ESTV), Sr. Domingos Lopes Lemos, Lic. Ed., MM., partisipa iha serimónia entrega sertifikadu ba dirijente eskolár sira, ne’ebé hala’o iha Salaun Edukasaun, Munisípiu Edukasaun RAEOA-Oe-Cusse Ambeno.
Iha serimónia ne’e, Sekretáriu Estadu subliña importánsia formasaun ba dirijente eskolár sira, liuliu iha aspetu lideransa, jestaun no responsabilidade profisionál, hodi bele hasa’e kualidade servisu iha área edukasaun.
Nia hateten katak lideransa diak hahú husi ezemplu ne’ebé ita hatudu, tanba dirijente tenki sai ezemplu ba ema seluk liuhusi atitude, komportamentu no maneira hala’o servisu.
“Lideransa signifika ita tenki hatudu ezemplu ba ema seluk. Ita tenki hatudu atitude diak, atu ema seluk bele haree no banati tuir saida mak ita halo.”
Aleinde ne’e, Sekretáriu Estadu enfatiza katak profesór la’ós de’it funsionáriu, maibé profisaun hanesan vokasaun ne’ebé presiza dedikasaun, responsabilidade no kompromisu aas atu hala’o knaar ho diak.
Nia mós apela ba dirijente eskolár sira atu hametin servisu hamutuk no kolaborasaun, hodi kria espíritu ekipa ida ne’ebé forte no efetivu. Nia husu atu dirijente sira fó prioridade ba interese servisu no objetivu institusionál, hodi hamutuk hadi’a kualidade edukasaun.
Sekretáriu Estadu subliña katak formasaun hanesan ne’e bele sai oportunidade atu hadi’a maneira hanoin, aumenta koñesimentu no hametin kapasidade dirijente eskolár sira, hodi sira bele fó kontribuisaun diak liután ba futuru edukasaun no ba dezenvolvimentu estudante sira.
“Liuhusi imi-nia esperiénsia sira ne’ebé diak no hanoin sira ne’ebé brillante, ita bele kontinua kontribui hodi hanorin no prepara ita-nia oan sira ba futuru ida ne’ebé diak liután.”
Serimónia ne’e hetan partisipasaun husi Prezidente INFORDEPE, reprezentante Autoridade RAEOA, Segundu Komandante PNTL Munisípiu RAEOA, Diretór Rekursu Umanu, Inspetór Jerál, Diretór Edukasaun no Servisu Munisipál RAEOA, no partisipante sira hotu.
