Oe-Cusse, 30 Setembru 2026 — Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál (ESG-ESTV), Sr. Domingos Lopes Lemos, Lic., Ed., MM., enserra atividade semináriu no orientasaun servisu ba diretór eskola sekundária ESG-ESTV, ne’ebé hala’o iha salaun Eskola Ensinu Sekundáriu Palaban, Oe-Cusse.
Iha nia intervensaun, Sekretáriu Estadu hato’o apresiasaun no agradese ba partisipante sira ne’ebé disponibiliza sira-nia tempu atu partisipa iha atividade ne’e. Nia hateten katak semináriu ne’e sai oportunidade importante atu dirijente eskola sira fahe esperiénsia, pratika no dezafiu ne’ebé hasoru iha sira-nia eskola ida-idak.
“Uluk nanain, hau hakarak agradese ba ita boot sira hotu tanba ita boot sira bele disponibiliza tempu atu mai husi rai boot mai rai ki’ik, hodi fahe esperiénsia ba malu kona-ba saida mak ita halo durante ne’e, no saida mak eskola sira seluk halo. Esperiénsia hirak-ne’e bele rikese ita-nia koñesimentu no ajuda ita hotu atu dezenvolve situasaun iha eskola ida-idak,” dehan Sekretáriu Estadu.
Nia subliña katak, nu’udar dirijente eskola, diretór sira tenki iha responsabilidade, disiplina no komitmentu aas iha hala’o sira-nia knaar. Dirijente eskola sira mós presiza fó orientasaun diak ba sira-nia funsionáriu no profesór sira, hodi garante prosesu aprendizajen ho kualidade iha eskola.
Sekretáriu Estadu mós hato’o orientasaun atu dirijente sira kontinua akompaña no monitoriza situasaun iha eskola, servisu hamutuk ho ekipa jestaun, asegura responsabilidade no disiplina, no tau atensaun ba protesaun no seguransa estudante sira. Tuir nia, monitorizasaun ne’ebé kontinuadu importante tebes atu hadi’a prosesu tomak ne’ebé dirijente sira lidera.
“Ho komitmentu tomak, responsabilidade no servisu hamutuk, hau fiar katak ita bele hadi’a liután kualidade servisu no prosesu aprendizajen iha eskola sira,” nia afirma.
Iha ikus, Sekretáriu Estadu fó korajen ba diretór eskola sira atu halo aplikasaun prátika ba rezultadu no aprendizajen ne’ebé hetan durante semináriu loron rua ne’e. Nia husu atu kada partisipante bele lori asaun konkreta ruma husi semináriu ne’e no implementa iha sira-nia eskola, hodi fó benefísiu ba dezenvolvimentu no hadi’a kualidade edukasaun.
Atividade ne’e partisipa hosi reprezentante Prezidente Autoridade Munisipál Oe-Cusse Ambeno, Diretór Nasionál ESG, Diretór Nasionál ESTV, Prezidente INFORDEPE, Diretór Rekursu Umanu, Diretór Edukasaun no Servisu Munisipál RAEOA Oe-Cusse, superintendente hosi munisípiu sira, diretór eskola sira, no dirijente hosi liña-servisu sira iha Ministériu Edukasaun.
