Covalima, 20 Outubru 2026 — Sekretáriu Estadu ba Ensinu Sekundáriu Jerál no Ensinu Sekundáriu Tékniku-Vokasionál (ESJ-ESTV), Sr. Domingos Lopes Lemos, kontinua hala’o monitorizasaun no observasaun direta ba prosesu realizasaun Ezame Nasionál Tinan Eskolár 2026, iha loron daruak, iha Eskola Ensinu Sekundáriu Jerál (ESJ) Nutetu Fohorem, no (EBC)Fohorem Munisípiu Covalima iha terca-feira ne’e.
Monitorizasaun ne’e iha objetivu atu observa diretamente preparasaun no ezekusaun Ezame Nasionál, no asegura katak prosesu avaliasaun ba estudante sira la’o ho orden, dixiplina no tuir prosedimentu ne’ebé estabelese ona.
Iha loron daruak ne’e, Sekretáriu Estadu ESJ-ESTV hamutuk ho ekipa monitorizasaun kontinua observa prosesu hala’o ezame, nu’udar esforsu atu asegura integridade no kredibilidade prosesu avaliasaun, no garante katak estudante sira bele demonstra koñesimentu no kapasidade ne’ebé sira hetan durante prosesu ensinu no aprendizajen.
Hafoin vizita monitorizasaun, Sekretáriu Estadu ESJ-ESTV mós hala’o enkontru ho dirijente eskola no fó orientasaun ba profesór sira atu kontinua mantein profisionalizmu, kumpre regulamentu no prosedimentu ezame ne’ebé vigora, no fó apoiu no akompañamentu adekuadu ba estudante sira durante realizasaun Ezame Nasionál.
Sekretáriu Estadu subliña katak kolaborasaun entre dirijente eskola, profesór no ekipa vijilánsia importante tebes atu asegura katak prosesu ezame la’o ho di’ak, ordenadu no transparente, to’o ba loron ikus ne’ebé sei taka prosesu Ezame Nasionál 2026.
