Atividade

Ministériu Edukasaun promove Kompetisaun KNEII nivel rejionál hodi dezenvolve koñesimentu, kapasidade intelektuál no kriatividade estudante Ensinu Sekundáriu Jeral

Manufahi, 11 Novembru 2026 – Ministériu Edukasaun hala’o kompetisaun rejionál Konkurzu Nasionál Edukasionál, Intelijente no Inovativu (KNEII), ba estudante sira husi Ensinu Sekundáriu Jerál Públiku (ESJP), iha Salaun Autoridade Munisipál Manufahi. Atividade ne’e nia objetivu atu dezenvolve koñesimentu, hametin kapasidade inteletuál no promove kriatividade estudante sira iha área edukasaun.

Kompetisaun rejionál ne’e envolve estudante sira husi Munisípiu haat iha rejiaun sul, hanesan Manufahi, Ainaro, Aileu no Covalima, ho kada Munisípiu reprezenta hosi eskola Ensinu Sekundáriu Jerál Públiku rua.

Munisípiu Manufahi reprezenta hosi ESGP Halibur Betanu no ESGP Borja da Costa; Munisípiu Covalima hosi ESGP Sentrál Suai no ESGP Zumalai; Munisípiu Ainaro hosi ESGP Sentrál Fernando Lasama de Araújo no ESGP Tas-Topa Hato-Udo; no Munisípiu Aileu hosi ESGP Sentrál Malere no ESGP N.º 1 Laulara.

Inisiativa ne’e iha objetivu atu avalia no hametin koñesimentu, kapasidade intelektuál no kriatividade estudante sira, no mós atu identifika no hili estudante sira ne’ebé iha kapasidade di’ak liu hosi kada munisípiu, hodi reprezenta sira iha faze nasionál.

Iha faze semifinal, eskola partisipante sira fahe ba grupu rua tuir área koñesimentu ida-idak, mak hanesan Grupu Siénsia no Teknolojia (CT) no Grupu Siénsia Sosiál no Umanidade (CSH).

Grupu A – Siénsia no Teknolojia (CT)

Grupu ida-ne’e kompostu hosi eskola sira tuirmai:

– ESGP Zumalai, Munisípiu Covalima;

– ESGP Tas-Topa Hato-Udo, Munisípiu Ainaro;

– ESGP Sentrál Suai, Munisípiu Covalima;

– ESGP Sentrál Malere, Munisípiu Aileu.

Grupu B – Siénsia Sosiál no Umanidade (CSH)

Grupu ida-ne’e kompostu hosi:

– ESGP Fernando Lasama de Araújo, Munisípiu Ainaro;

– ESGP Borja da Costa, Munisípiu Manufahi;

– ESGP N.º 1 Laulara, Munisípiu Aileu;

– ESGP Halibur Betanu, Munisípiu Manufahi.

Molok remata kompetisaun, komisaun organizadora hamutuk ho prezidente juri no membru sira hala’o serimónia entrega prémiu ba eskola sira ne’ebé hetan rezultadu di’ak liu iha kada grupu.

Rezultadu kompetisaun Grupu A – Siénsia no Teknolojia (CT):

– 1.º Lugár: ESGP Tas-Topa Hato-Udo, Munisípiu Ainaro;

– 2.º Lugár: ESGP Sentral Suai, Munisípiu Covalima;

– 3.º Lugár: ESGP N.º 1 Laulara, Munisípiu Aileu.

Rezultadu kompetisaun Grupu B – Siénsia Sosiál no Umanidade (CSH):

– 1.º Lugár: ESGP Fernando Lasama de Araújo, Munisípiu Ainaro;

– 2.º Lugár: ESGP Halibur Betanu, Munisípiu Manufahi;

– 3.º Lugár: ESGP N.º 1 Laulara, Munisípiu Aileu.

Realizasaun kompetisaun rejionál KNEII ne’e sai hanesan inisiativa ida hosi Ministériu Edukasaun atu promove kualidade ensinu, estimula espíritu kompetisaun saudável entre estudante sira, no hametin kapasidade akadémika, intelektuál no kriativa hodi prepara jerasaun foun atu enfrenta dezafiu edukasaun no futuru nasaun.