Railaco, 9 Outubru 2026 — Ministra Edukasaun, Dra. Dulce de Jesus Soares, inaugura edifísiu foun Eskola Básika Filiál (EBF) 4 de Setembro, iha Railaco-Vila, Munisípiu Ermera. Eskola ne’e sai parte husi esforsu Ministériu Edukasaun hamutuk ho organizasaun Spend It Well atu hadi’a infraestrutura eskolár no asegura ambiente aprendizajen ne’ebé seguru no apropriadu ba estudante sira. Ho inaugurasaun ne’e, EBF 4 de Setembro sai eskola númeru 29 ne’ebé harii hosi organizasaun Spend It Well ba Ministériu Edukasaun.
Iha serimónia inaugurasaun, Ministra Edukasaun hato’o agradesimentu ba organizasaun Spend It Well, liuliu Kris Webb, Nandy Gurr no Simon Fenby, tanba sira-nia apoiu no kompromisu atu kontribui ba dezenvolvimentu edukasaun iha Timor-Leste. Nia konsidera parseria ne’e nu’udar kontribuisaun importante ida hodi haforsa infraestrutura eskoár no hadi’a kondisaun aprendizajen ba labarik sira.
Ministra mós hato’o agradesimentu espesiál ba joven na’in-rua hosi Austrália, Leo no Cezary, ne’ebé halo viajen ho bisikleta hale’u Austrália tomak atu rekolla fundus ba konstrusaun eskola iha Timor-Leste. Nia apresia sira-nia esforsu, solidariedade no vontade atu apoia labarik sira-nia asesu ba edukasaun.
Iha nia intervensaun, Ministra subliña katak konstrusaun no reabilitasaun infraestrutura eskolár kontinua sai prioridade ba Ministériu Edukasaun, liuliu iha área sira ne’ebé presiza fasilidade adekuada. Nia enkoraja koordenadór no manorin sira atu hala’o knaar ho responsabilidade, kumpre oras hanorin nian no implementa kurríkulu ho di’ak, hodi asegura katak estudante sira hetan aprendizajen ne’ebé kualidade.
Aleinde ne’e, Ministra husu komunidade eskolár, inklui manorin, estudante no inan-aman sira, atu hamutuk tau-matan ba edifísiu foun ne’e, mantein limpu no uza fasilidade sira ho responsabilidade. Nia afirma katak kuidadu no manutensaun ba infraestrutura eskolár importante tebes atu edifísiu ne’e bele uza durante tempu naruk no kontinua fó benefísiu ba jerasaun estudante sira iha Railaco Vila.
Inaugurasaun EBF 4 de Setembro ne’e reflete importánsia kolaborasaun entre Ministériu Edukasaun, organizasaun Spend It Well no parseiru sira-seluk atu kontinua investe iha infraestrutura eskolár. Ho ambiente aprendizajen ne’ebé di’ak liu, hein katak estudante sira bele aprende ho konfortu no dezenvolve sira-nia koñesimentu no kapasidade atu prepara an ba futuru.
