Ermera, 09-10-2026, Sua Exelénsia Sekretáriu Estadu ESJ-ESTV Sr.Domingos Lopes Lemos halo abertura serimónia internasionál ho Tema “ Rezisténsia Sobrevivénsia Kafé Íbridu Timór, Patrimóniu Genétiku no Kulturál, Ekonomia Futuru Sustentável Kafé iha Timor-Leste” iha salaun kafé robusta Ermera.
Iha intervensaun Sua Exelénsia Sekretáriu Estadu ESJ-ESTV Sr.Domingos Lopes Lemos hateten, ohin ita hasoru malu fatin ne’e hodi partisipa iha serimónia internasionál kafé íbridu ne’e, importante tebes ba ita hotu no ba to’os-na’in sira iha Ermera no Munisípiu seluk sai hanesan valór patrimóniu kulturál no elementu identidade nasionál no rekursu ekonómiku estratéjiku ba ita-nia nasaun Timor-Leste.
Governante ne’e enfatiza katak kafé ìbridu la’os deit reprezenta parte importante iha istória no kultura timór nian, maibé mós hanesan oportunidade atu haforsa valór sosiál no ekonómiku iha produsaun nasionál kafé nian.
Tanba ne’e Ministériu Edukasaun liuhosi Sekretáriu Estadu ESJ-ESTV tau prioridade liliu ba eskola tékniku vokasionál sira atu bele instala ona departamentu kafé ne’e sai nu’udar pilár importante ida hodi bele garante kualidade no sustentabilidade hodi fó rezultadu aprendizajen no produsaun kafé nian iha ita-nia rai rasik.
Governante ne’e nafatin fó hanoin semináriu nasionál ohin loron, espera katak ita la’ós de’it diskute iha teoria nia laran, maibé mós prodús rekomendasaun konkretu no pasu prátiku hodi foti liután indústria kafé iha Timor-Leste, no ba estudante jerasaun foun sira iha Ermera, sai hanesan motór ba mudansa no peskizadór foun sira ne’ebé hadomi rai-na’in no foti kafé Timór ba mundu tomak.
