Ermera, 10 Setembru 2026 – Sua Exelénsia Ministra Edukasaun, Dra. Dulce de Jesus Soares, halo vizita surpreza ba Eskola Ensinu Báziku Filiál (EEBF) Fahiteen, ho objetivu atu observa diretamente implementasaun Programa Merenda Eskolár no prosesu aprendizajen estudante sira.
Iha vizita ne’e, Ministra Edukasaun observa preparasaun merenda eskolár no asegura katak ai-han prepara ho di’ak no tuir menu ne’ebé determina. Aleinde né’e, Ministra observa diretamente prosesu aprendizajen no interasaun entre profesór no estudante sira iha sala aula.
Ministériu Edukasaun rekoñese katak iha posibilidade eskola balu seidauk implementa programa tuir regra no padraun ne’ebé determina. Tanba ne’e, Ministériu Edukasaun sei kontinua halo supervizaun no monitorizasaun hamutuk ho Ministériu Administrasaun Estatál, atu asegura katak estudante sira hetan ai-han nutritivu no saudável kada loron.
Ministériu Edukasaun hato’o agradese wa’in ba komunidade, inan-aman no ema hotu ne’ebé kontinua fó apoiu no atensaun ba implementasaun Programa Merenda Eskolár. Ministériu mós enkoraja komunidade atu relata bainhira iha problema ka buat ruma la’o la tuir regra iha eskola, tanba kooperasaun husi parte hotu importante tebes ba hadi’a kualidade edukasaun no “bem-estar” estudante sira.
Rekorda fali katak, Programa Merenda Eskolár mak polítika ida husi Governu Timor-Leste nian ne’ebé fó refeisaun diária, saudável no nutritiva ba estudante sira iha eskola.
Programa ne’e iha objetivu prinsipál tolu, mak: hasa’e nutrisaun hodi asegura katak labarik sira hetan ai-han ekilibradu ne’ebé ajuda sira-nia kreximentu no dezenvolvimentu; hadi’a prosesu aprendizajen hodi aumenta estudante sira-nia konsentrasaun, partisipasaun no frekuésia iha eskola; no promove produtu lokál, liuhusi apoiu ba ekonomia lokál ho sosa ai-han husi agrikultór no produtór lokál sira.
