Aileu, 12 Outubru 2026 – Sua Exelénsia Ministra Edukasaun Dra. Dulce de Jesus Soares hamutuk ho Prezidente Autoridade Munisípiu Aileu Sr.Jacinto Ribeiro Dias hala’o inaugurasaun ba santuário São João Paulo II sai hanesan Mahein ba eskola bázika filiál Saboria (EBF), hodi hametin fidelidade sabedoria no solidariedade ba estudante no komunidade sira iha Munisipiu Aileu Postu Administrativu Aileu vila, Segunda-feira ne’e.
Iha diskursu Sua Exelénsia Ministra Edukasaun Dra. Dulce de Jesus Soares dehan Sua Santidade Amu Papa João Paulo II sempre fó inspirasaun, matadalan, fó esperansa no diresaun ne’ebé la kléur mai ita hotu nu’udar povu Timór, liuliu ba ita sira-ne’ebé serví iha setór-edukasaun.
Hanesan ita hotu hatene, Sua Santidade nia vizita ba Tasi Tolu iha loron 12 de Outubro de 1989, sai nu’udar momentu istóriku iha ita-nia luta ba ukun rasik- an. Nia prezensa fó fali mai ita enerjia foun no korajen hodi kontinua ita-nia luta, no haruka mensajen ne’ebé momoos ba mundu tomak katak povu Timor-Leste mós eziste no iha valór.
Husi mensajen Papa nian iha momentu ne’eba dehan povu Timor-Leste iha direitu ba dignidade no liberdade hanesan mós ema seluk. Ninia liafuan ne’ebé sei la mate, hodi dudu ita-nia foin-sa’e sira atu sai “masin rai nian no roman mundu nian”, mak liafuan ne’ebé ita-nia povu ne’ebé kole no persegidu presiza tebes rona iha tempu ne’ebá. Liafuan sira-ne’e fó-hanoin mai ita katak Maromak hamutuk ho ita, Maromak apoia ita-nia luta ba independénsia, no ita ida-idak mak importante.
“Imi la’ós funu-na’in sira-ne’ebé uza kilat ba independénsia, maibé imi funu ba dezenvolvimentu, matenek, no progresu ba ita-nia rain. Imi seidauk moris bainhira imi-nia avó sira terus, maibé sira-nia sakrifísiu ne’e halo ita hotu bele goza moris ne’ebé di’akliu no moris iha liberdade. Sira-ne’e la’ós prezente ne’ebé ita bele simu de’it, hodi haluha nia valór. Dalan ne’ebé di’akliu atu hanoin no onra sira mak hodi sai estudante ne’ebé badinas, respeitozu, no prepara imi-nia an atu sai sidadaun ne’ebé ativu no responsavel.” Dehan Ministra
Sua Santidade mós iha fatin permanente iha ita-nia eskola sira nu’udar Padroeiru Ofisiál ba Edukasaun no Foin-sa’e sira. Bainhira ita foti desizaun hodi fó onra nasionál ne’e iha tinan 2019, Ministériu Edukasaun komesa lori nia estátua sirkula iha eskola sira iha rai laran, ho objetivu atu fó-hanoin ba estudante sira katak sira ida-idak espesiál iha Maromak nia oin, no moris mai ho talentu oioin hodi fó kontribuisaun ba sosiedade.
Amu Papa João Paulo II nu’udar ema ne’ebé matenek no inteletuál boot. Nia simboliza importánsia hosi estuda, analiza, no serbisu maka’as. Maibé nia mós fó-hanoin loroloron katak matenek de’it laiha valór boot se la akompaña mós ho fiar, integridade, no domin ba ema seluk.