Baucau, 13 Novembru 2026 – Ministériu Edukasaun hala’o kompetisaun rejionál Konkursu Nasionál Edukasionál, Intelijente no Inovativu (KNEII), ba estudante sira husi Ensinu Báziku Siklu Datoluk, iha Salaun INFORDEPE, Munisípiu Baucau. Objetivu husi atividade ne’e atu dezenvolve koñesimentu, hametin kapasidade inteletuál no promove kriatividade estudante sira iha área edukasaun.
Kompetisaun rejionál ne’e, Diretór Enisnu Sekundáriu Jeral Sr. Benjamin Gomes da Cruz Fernandes, husu ba manorin sira ne’ebé akompaña estudante sira iha kompetisaun ida-ne’e, nafatin akompaña estudante sira durante kompetisaun husi hahú to’o remata, atu nun’e fila ba eskola aplika fali saida mak akontese durante kompetisaun ne’e ba estudante sira-seluk.
Nune’e iha kompetisaun rejionál ne’e, abertura husi Diretór Ensinu Sekundáriu Jerál ne’e rasik.
Kompetisaun rejionál ne’e envolve estudante sira husi Munisípiu haat iha rejiaun leste hanesan, Baucau, Lautém, Manatuto no Viqueque, ho kada Munisípiu reprezenta hosi eskola Ensinu Báziku ida.
Munisípiu Baucau reprezenta hosi eskola CAFE, Munisípiu Lautém hosi EBC Sentru Lospalos, Munisípiu Manatuto hosi EBC Hatumetac no Munisípiu Viqueque hosi EBC 07 Uatulari.
Inisiativa ne’e iha objetivu atu avalia no hametin koñesimentu, kapasidade inteletual no kriatividade estudante sira, no mós atu identifika no hili estudante sira ne’ebé iha kapasidade di’ak liuhosi kada munisípiu, hodi reprezenta sira iha faze nasionál.
Molok remata kompetisaun, komisaun organizadora hamutuk ho prezidente juri no membru sira hala’o serimónia entrega prémiu ba eskola sira ne’ebé hetan rezultadu di’ak-liu iha kada reprezentante Munisípiu.
Nune’e Rezultadu kompetisaun rejionál leste nian maka hanesan:
– 1.º Lugár ho totál valór 92, husi eskola CAFE, Munisípiu Baucau;
– 2.º Lugár ho totál valór 83.1, husi EBC Sentru Lospalos, Munisípiu Lautém;
– 3.º Lugár ho totál valór 42.5, husi EBC Hatumetak, Munisípiu Manatuto.
Realizasaun kompetisaun rejionál KNEII hanesan inisiativa ida hosi Ministériu Edukasaun atu promove kualidade ensinu no hametin kapasidade akadémika, inteletuál no kriativa hodi prepara jerasaun foun atu enfrenta dezafiu edukasaun no futuru nasaun.






