Díli, 05 Novembru 2026 – Ministra Edukasaun, Dra. Dulce de Jesus Soares, ohin hala’o enkontru ho Embaixadór Extraordináriu no Plenipotensiáriu Repúblika Sosialista Vietname iha Timor-Leste, Sr. Pham Binh Dam, atu diskute kona-ba oportunidade kooperasaun entre nasaun rua, liuliu iha área edukasaun, inklui posibilidade introdús matéria Lian Inglés iha Eskola Ensinu Báziku (EEB), hahú husi klase 5 to’o klase 6, iha tinan 2027. Enkontru ne’e hala’o iha Sala VIP, Ministériu Edukasaun, Vila-Verde, Kinta-feira.
Iha entrevista ba mídia, Ministra Edukasaun, Dra. Dulce de Jesus Soares, esplika katak enkontru ne’e hala’o iha kontestu akordu kooperasaun entre Ministériu Edukasaun Timor-Leste no Ministériu Edukasaun Vietname. Nune’e, Ministériu Edukasaun Timor-Leste forma ona ekipa konjunta atu esplora no identifika área sira ne’ebé iha potensiál ba kooperasaun entre nasaun rua.
“Ohin ami hahú diskute kona-ba área dijitalizasaun, no mós planu Ministériu Edukasaun atu introdús matéria Lian Inglés iha Eskola Ensinu Báziku, liuliu ba estudante sira iha klase 5 no klase 6. To’o agora, matéria Lian Inglés hahú hanorin de’it iha klase 7. Maibé, iha tinan oin, Ministériu Edukasaun hakarak koko implementa matéria ne’e iha Ensinu Báziku, liuhosi projetu pilotu iha eskola ida ka rua, molok atu estende ba eskola sira-seluk,” tenik Ministra.
Ministra mós afirma katak introdusaun matéria Lian Inglés iha Ensinu Báziku sei hahú iha tinan 2027, maibé antes implementasaun, Ministériu Edukasaun sei halo preparasaun no avaliasaun kona-ba rekursu umanu, liuliu disponibilidade no prontidaun manorin sira, no mós materiál didátiku ne’ebé presiza atu apoia prosesu aprendizajen.
Inisiativa ne’e sei hahú ho faze pilotu atu permite Ministériu Edukasaun avalia prosesu implementasaun no prepara kondisaun ne’ebé nesesáriu antes atu estende programa ne’e ba eskola Ensinu Báziku sira-seluk.





