Atividade

Ministériu Edukasaun ho Spend It Well inaugura Eskola Bázika Filiál 1 no 2 Iatua, Baucau

Baucau, 7 Novembru 2026 – Ministra Edukasaun, Dra. Dulce de Jesus Soares, hamutuk ho Prezidente Autoridade Munisipál Baucau, Dra. Veneranda E. M. Lemos, Embaixadora Boa-Vontade ba Edukasaun, Sra. Kirsty Sword-Gusmão, no reprezentante husi organizasaun Spend It Well, Sra. Nandy Gurr, hala’o serimónia inaugurasaun ba Eskola Bázika Filiál 1 no 2 Iatua, Munisípiu Baucau, iha sábadu ne’e. Inaugurasaun ne’e marka tan kontribuisaun organizasaun Spend It Well ba dezenvolvimentu infraestrutura edukasaun iha Timor-Leste.

Iha ninia diskursu, Ministra Edukasaun hato’o katak dala ruma, bainhira haree lista eskola barak ne’ebé presiza konstrui ka reabilita, nia sente katak knaar ne’e boot tebes. Maibé, depois de partisipa iha inaugurasaun eskola sira ne’ebé harii ho apoiu husi Spend It Well, nia sente esperansa katak iha futuru besik, estudante hotu-hotu bele hetan asesu ba ambiente aprendizajen ne’ebé dignu, seguru no konfortável.

“Ami, husi Ministériu Edukasaun, hakarak hato’o obrigadu barak ba Mana Nandy no Spend It Well tanba apoiu importante ida-ne’e. Tulun ne’ebé imi fó ami labele selu fila-fali, maibé ami hein katak bainhira imi haree labarik sira kontente, imi mós sei sente kontente”, dehan Ministra.

Ministra akrexenta katak kada eskola ne’ebé Spend It Well harii iha Timor-Leste iha ninia istória no signifikadu rasik. Eskola Iatua ne’e sai eskola númeru 31 ne’ebé organizasaun Spend It Well harii iha Timor-Leste, no iha eskola seluk ida tan ne’ebé besik atu kompleta iha Rejiaun Administrativa Espesiál Oe-Cusse Ambeno (RAEOA).

Nia mós esplika katak durante tinan balu nia laran, Spend It Well dala barak hetan apoiu husi doadór boot ida ka rua atu finansia konstrusaun eskola ida. Maibé, konstrusaun eskola Iatua ne’e diferente, tanba organizasaun ne’e fila-fali ba ninia maneira inisiál, ne’ebé mak halibur osan uitoan-uitoan husi fonte oioin. Atu bele realiza projetu ida-ne’e, apoiadór sira to’o halo atividade fa’an hahán hanesan dose no xourisu hafoin misa, no halibur kontribuisaun husi komunidade to’o osan ne’ebé presiza natoon atu harii eskola.

“Ohin imi iha edifísiu eskola foun no furak, maibé komponente importante sira-seluk atu bele oferese edukasaun ho kualidade iha imi-nia liman. Ha’u fiar katak imi sei jere eskola ida-ne’e ho di’ak no efisiente, liuhusi kontrola oras hanorin, kualidade hanorin, orsamentu, dadus, dokumentasaun no jestaun eskola”, afirma Ministra.

Nia kontinua husu ba manorin sira atu la haluha katak futuru labarik sira nian iha sira-nia liman. Tanba ne’e, manorin sira tenke hanorin estudante tuir oras no kurríkulu, respeita kada labarik no buka atu koñese estudante ida-idak nu’udar ema  individu ida ho ninia karaterístika no nesesidade rasik.

Iha oportunidade hanesan, reprezentante Spend It Well, Sra. Nandy Gurr, hato’o ninia ksolok no satisfasaun tanba bele realiza inaugurasaun Eskola Bázika Filiál 1 no 2 Iatua, ne’ebé sai eskola númeru 31 ne’ebé organizasaun ne’e ajuda harii iha Timor-Leste.

“Ami fiar katak labarik Timor-Leste sira mak futuru nasaun nian, no ami hakarak kontinua fó apoiu ba sira. Ami mós hakarak hato’o agradesimentu ba doadór hotu-hotu ne’ebé kontribui no fó apoiu ba projetu eskola ida-ne’e. Ami husu ba manorin no estudante sira atu uza no kuidadu eskola foun ne’e ho responsabilidade, hanesan imi kuidadu imi-nia an rasik”, dehan Nandy Gurr.

Inaugurasaun eskola ne’e reflete kooperasaun entre Ministériu Edukasaun, organizasaun Spend It Well no parseiru sira, atu kontinua hametin infraestrutura eskolár no kria ambiente aprendizajen ne’ebé di’ak liután ba labarik sira iha Timor-Leste.