Dili, 09 Novembru 2026- Ministra Edukasaun Dra. Dulce de Jesus Soares hamutuk ho komisaun organizadora 12 Novembru loke ofisialmente sertame nasionál ba estudante sira husi ensinu báziku siklu dahuluk no siklu daruak, ho objetivu atu hametin koñesimentu, komprensaun no konxiénsia jerasaun foun kona-ba istória Masakre Santa Kruz, ne’ebé akontese iha 12 Novembru 1991, no luta rezisténsia povu Timor-Leste nian, iha segunda – feira ne’e.
Iha nia diskursu Ministra Edukasaun Dra. Dulce de Jesus Soares haktuir katak iha ámbitu komemorasaun masakre 12 Novembru 1991 estudante sira presiza aprende no komprende istória luta no sakrifísiu ne’ebé juventude Timor-leste nian hala’o iha tempu okupasaun ne’ebé barak mak lakon sira-nia vida no balun-seluk kontinua moris to’o ohin loron. Ministra mós husu ba estudante sira atu aprende no valoriza istória ne’e, tanba masakre santa kruz nu’udar parte importante ida hosi istória Nasaun nian, ne’ebé tenke kontinua hela metin iha fuan no hanoin hosi jerasaun ba jerasaun.
“Edukasaun bázika siklu dahuluk no daruak mak sai nu’udar fundamentu ba formasaun sidadaun Timor-Leste nian. Bainhira ita ko’alia kona-ba 12 Novembru, ita ko’alia mós kona-ba istória no komprensaun kona-ba luta ba ukun-rasik-an,” Dehan líder Ministériu Edukasaun ne’e
Líder másimu Ministériu Edukasaun nian mós apela ba estudante sira atu aproveita oportunidade ne’e hodi aprende no komprende kle’an liután istória nasaun nian, liuliu liuhusi testemuña moris husi ema sira-neʼebé envolve diretamente iha akontesimentu 12 Novembru 1991.
Ministra haktuir katak Manorin sira tenke kontinua eduka no orienta estudante sira kona-ba istória ne’e, tanba matéria kona-ba 12 Novembru agora tama ona iha kurríkulu Ministériu Edukasaun nian atu nune’e, estudante sira bele hatene kle’an liután istória masakre Santa Cruz no valoriza sakrifísiu ne’ebé hala’o hodi hetan indeoendénsia nasaun nian.
Iha fatin hanesan Prezidente Komisaun Organizadora 12 Novembru, Denilson Guterres, dehan katak sertame nasionál ne’e nia objetivu mak atu komemora Masakre Santa Kruz no mantein istória luta rezisténsia Timor-Leste nian, husi 1975 to’o 1999, atu istória importante ne’e labele lakon hosi memória no konxiénsia jerasaun foun.
“Komisaun Organizadora fó oportunidade ba estudante sira husi ensinu báziku siklu dahuluk no daruak atu hatene no komprende kle’an liután istória 12 Novembru no luta ba libertasaun nasaun nian,” nia dehan
Denilson Guterres esplika tan katak atividade ne’e envolve estudante sira husi eskola ensinu báziku sentrál no filiál iha Munisípiu Dili, inklui Eskola Bázika Kristál, EBF Bemori, EBF Faról, Ensinu Báziku São Carlos Manleuana, Eskola Kamea no EBF Bidau.
Kona-ba prémiu ba estudante manán-na’in sira iha sertame nasionál ne’e, komisaun organizadora prepara materiál edukativu hanesan kadernu, lapizeira, livru istória kona-ba 12 Novembru no pintura ne’ebé reprezenta Masakre Santa Cruz atu fó hanesan prémiu ba estudante sira-neʼebé hetan pozisaun manán-na’in.








