Atividade

Ministériu Edukasaun hala’o enkontru servisu no despedida ho Embaixadora Austrália

Díli, 6 Novembru 2026 – Ministra Edukasaun, Dra. Dulce de Jesus Soares, hala’o enkontru servisu no despedida ho Embaixadora Austrália iha Timor-Leste, Sra. Caitlin Wilson, hodi ko’alia kona-ba orientasaun estratéjika ba programa foun Timor-Leste–Australia Partnership for Education, no mós rezultadu husi kooperasaun bilaterál iha setór edukasaun. Enkontru ne’e hala’o iha Sala VIP Ministériu Edukasaun, sexta-feira ne’e.

Iha entrevista ba komunikasaun sosiál, Ministra Edukasaun hato’o ninia apresiasaun no agradesimentu ba Governu Austrália no Embaixadora Caitlin Wilson, tanba kontribuisaun no kolaborasaun importante ne’ebé dezenvolve durante tinan hirak liubá ho Ministériu Edukasaun, liuliu iha área ensinu báziku, edukasaun pré-eskolár, formasaun ba manorin, jestaun no observasaun prátika pedagójika iha sala aula, dezenvolvimentu kurríkulu no inspesaun eskolár.

“hodi naran Ministériu Edukasaun, estudante no manorin sira, ami hakarak hato’o agradeseimentu kle’an ba Governu Austrália, liuhusi Embaixadora, ba kontribuisaun importante ne’ebé fó ona ba setór edukasaun iha Timor-Lest”, dehan Ministra.

Kona-ba programa Timor-Leste–Australia Partnership for Education, Ministra esplika katak área prinsipál sira ne’ebé programa ne’e sei foka mak hametin jestaun no observasaun prátika pedagójika iha sala aula, formasaun kontínua ba manorin sira no dezenvolvimentu kapasidade inspetór eskolár sira. Área hirak-ne’e konsidera nu’udar baze importante atu hadi’a kualidade ensinu no aprendizajen iha Timor-Leste.

Iha parte seluk, Embaixadora Austrália, Sra. Caitlin Wilson, afirma katak enkontru ne’e sai oportunidade ida atu analiza fila-fali kooperasaun ne’ebé dezenvolve entre Governu Austrália no Governu Timor-Leste durante tinan tolu nia laran, ne’ebé mós hanesan períodu ninia mandatu diplomátiku, no atu haree progresu ne’ebé alkansa ona iha setór edukasaun.

Embaixadora ne’e mós haktuir katak enkontru ne’e fó oportunidade atu ko’alia kona-ba programa kooperasaun edukasaun foun ne’ebé sei implementa iha futuru, ne’ebé sei hala’o servisu besik ho Ministériu Edukasaun no ekipa téknika relevante sira.

Programa foun ne’e sei fó prioridade ba hametin ensinu báziku no kontinua dezenvolve servisu no inisiativa sira ne’ebé implementa ona durante períodu kooperasaun anteriór ho objetivu atu kontribui ba hadi’a kualidade edukasaun iha Timor-Leste.