Atividade

Ministériu Edukasaun hala’o sertame KNEII nivel rejionál ba rejiaun Sul iha Manufahi hodi dezenvolve kapasidade inteletuál no kriatividade estudante sira

Manufahi, 09 Novembru 2026 – Ministériu Edukasaun, liuhosi Diresaun Nasionál Ensinu Báziku, hala’o kompetisaun Nasionál Edukasionál, Intelijente no Inovativu (KNEII) nível rejionál ba Rejiaun Sul, ne’ebé envolve estudante sira husi Munisípiu Manufahi, Ainaro, Aileu no Covalima. Atividade ne’e nia objetivu mak dezenvolve kapasidade hanoin krítiku, kriatividade no koñesimentu edukasionál estudante sira, liuliu iha Siklu III Ensinu Báziku, klase 7. Abertura kompetisaun ne’e hala’o iha Salaun Enkontru Autoridade Munisipál Manufahi, Suku Holarua, Postu Administrativu Same, Munisípiu Manufahi, Segunda-feira.

Iha ninia diskursu, Koordenadór Gabinete Unidade Kurríkulu Nasionál, Sr. João Maupelu, haktuir katak kompetisaun ne’e la’ós atu haree de’it estudante sira-nia kapasidade atu fó resposta loos, maibé mós atu dezenvolve sira-nia abilidade atu esplika razaun, fundamenta konkluzaun no aplika koñesimentu ne’ebé sira aprende ona ba situasaun konkreta iha moris loroloron.

“Aproveita esperiénsia ida-ne’e hodi hatudu katak estudante Timoroan sira iha kapasidade atu hanoin, investiga, kria no kontribui hodi buka solusaun ba dezafiu sira iha komunidade, nasaun no mundu,” dehan Koordenadór Unidade Kurríkulu Nasionál.

Iha oportunidade ne’ebé hanesan, Reprezentante Autoridade Munisipál Manufahi, Sekretáriu III Asuntu Sosiál, Sr. Aleixo de Deus, hato’o katak kompetisaun nível rejionál ne’e envolve Munisípiu haat, mak Manufahi, Ainaro, Aileu no Covalima, ho objetivu atu identifika no dezenvolve estudante sira-nia talentu no kapasidade inteletuál.

Nia mós afirma katak kompetisaun ne’e sai hanesan oportunidade importante atu identifika talentu ne’ebé estudante sira iha no fó dalan ba sira atu hatudu kapasidade liuhosi kompetisaun ne’ebé sei prodús rezultadu di’ak.

Enkuantu ne’e, Diretora Servisu Munisipál Edukasaun Manufahi, Sra. Joaninha da Silva Soares, esplika katak kompetisaun KNEII ne’e foka espesifikamente ba estudante Siklu III Ensinu Báziku, klase 7, husi Munisípiu haat iha Rejiaun Sul.

Nia haktuir katak objetivu prinsipál hosi atividade ne’e mak atu estimula no dezenvolve estudante sira-nia kapasidade hanoin krítiku, kriativu no koñesimentu sientífiku, liuhosi aplikasaun prátika ba matéria sira ne’ebé sira aprende husi manorin sira iha eskola.

“Objetivu mak atu dezenvolve no estimula pensamentu krítiku, kriativu no koñesimentu edukasionál estudante sira iha área siénsia, bazeia ba matéria ne’ebé durante ne’e sira aprende husi sira-nia manorin sira iha eskola,” dehan Diretora Servisu Munisipál Edukasaun Manufahi.

Atu taka kompetisaun, organizadór sira entrega prémiu ba eskola sira ne’ebé hetan klasifikasaun manán-na’in, ho rezultadu hanesan tuirmai:

– Primeiru lugár: Eskola Ensinu Báziku Siklu III Fatuco, Same, Munisípiu Manufahi.

– Segundu lugár: Eskola Ensinu Báziku Siklu III Aço-Mau, Remexio, Munisípiu Aileu.

– Terseiru lugár: Eskola Ensinu Báziku Siklu III Venâncio Ferraz, Munisípiu Ainaro.

Liuhosi kompetisaun KNEII ne’e, Ministériu Edukasaun kontinua promove no hametin kultura aprendizajen, hanoin krítiku, inovasaun no kriatividade entre estudante sira, nu’udar parte hosi esforsu atu hadi’a kualidade edukasaun iha Timor-Leste.