Díli, 21 Outubru 2026 — Diretór-Jerál Ensinu Sekundáriu, Sr. Deolindo da Cruz, hamutuk ho asesora gabinete Sekretáriu Estadu ESJ-ESTV, Sra. Grasiela Gunardi, partisipa iha Enkontru Bilaterál Daruak kona-ba Komérsiu Bilaterál no Kooperasaun Ekonómika entre Governu Repúblika Populár Xina no Governu Repúblika Demokrátika Timor-Leste, ne’ebé hala’o iha Salaun Nobre, Ministériu Negósiu Estranjeiru no Kooperasaun (MNEC), kuarta-feira ne’e.
Enkontru ne’e nia objetivu mak atu hametin liután relasaun kooperasaun entre Timor-Leste no Xina, liuliu iha área estratéjika sira, hanesan dezenvolvimentu kapasidade no transferénsia teknolojia, apoiu ba infraestrutura, konstrusaun instalasaun desportiva, finansiamentu projetu ba hadi’a baze fornesimentu, konstrusaun autoestrada, no kooperasaun iha área kultura no turizmu.
Enkontru bilaterál ne’e sai nu’udar plataforma importante ba nasaun rua atu kontinua hametin diálogu no kooperasaun, ho objetivu atu promove dezenvolvimentu ekonómiku no buka oportunidade foun ne’ebé bele lori benefísiu ba povu Timor-Leste no Xina.
Enkontru ne’e lidera husi Sua Exelénsia Sra. Jesuína Maria Ferreira Gomes, Vise-Ministra Negósiu Estranjeiru no Kooperasaun Timor-Leste, hamutuk ho Sr. Yan Dong, Vise-Ministru Komérsiu Repúblika Populár Xina, no respetivu delegasaun.
Partisipasaun Diretór-Jerál Ensinu Sekundáriu iha enkontru ne’e hatudu envolvimentu setór edukasaun nian iha esforsu hametin relasaun bilaterál entre Timor-Leste no Xina, no mós oportunidade atu buka kooperasaun ne’ebé bele apoia dezenvolvimentu edukasaun no rekursu umanu iha futuru.
Partisipante sira-seluk inklui Diretór-Jerál Ensinu Superiór, reprezentante Ministériu Komérsiu no Indústria, Diretór-Jerál Ambiente, Diretór-Jerál Servisu Kooperativa husi Ministériu Agrikultura, Pekuária, Peska no Floresta, reprezentante Ministériu Petróleu no Rekursu Minerál, reprezentante área operasionál no Superintendente Adjuntu Polísia, no Diretór-Jerál Administrasaun no Finansas husi Ministériu Planeamentu no Investimentu Estratéjiku.
