DÍLI, 10 Novembru 2026 – Ministra Edukasaun, Dra. Dulce de Jesus Soares, hamutuk ho Primeiru-Ministru, Kay Rala Xanana Gusmão, partisipa iha serimónia inaugurasaun ba sala-aula foun hamutuk 9 iha Eskola Bázika Filiál (EBF) 12 de Outubru, Tasi Tolu. Infraestrutura edukativa ne’e konstrui liuhosi kolaborasaun entre Ministériu Edukasaun, Dreams Asia no Octava Foundation, hodi hadi’a kondisaun no aumenta asesu ba ambiente aprendizajen ne’ebé seguru no konfortavel ba estudante sira.
Iha serimónia inaugurasaun ne’e, Primeiru-Ministru Kay Rala Xanana Gusmão hato’o mensajen ba estudante no inan-aman sira atu aproveita ho di’ak oportunidade edukasaun ne’ebé disponivel, liuhosi infraestrutura eskolár foun ne’e, hodi aumenta koñesimentu no prepara an ba futuru.
“Eskola ne’e, ita-nia parseiru sira halo la’ós tanba ha’u ka Ministra Edukasaun, maibé tanba sira-nia fuan boot ne’ebé fó ba labarik sira. Tanba ne’e, eskola furak ne’e harii atu estuda, la’ós atu halimar de’it”, Primeiru-Ministru Xanana Gusmão dehan.
Konstrusaun edifísiu foun ne’e responde diretamente ba nesesidade sala-aula iha eskola ne’e, ne’ebé antes la sufisiente atu atende númeru estudante ne’ebé aumenta, hodi afeta prosesu aprendizajen tanba limitasaun kapasidade sala-aula.
Ho infraestrutura foun ne’e, estudante sira sei bele aprende iha ambiente ne’ebé di’ak, seguru no konfortavel liu, ho fasilidade sala-aula no instalasaun sanitária ne’ebé apoia prosesu aprendizajen no bem-estar estudante sira.
Iha oportunidade hanesan, Ministra Edukasaun esplika katak konstrusaun sala-aula foun sira-ne’e nu’udar rezultadu hosi inovasaun no buka solusaun alternativa atu responde ba nesesidade infraestrutura eskolár iha Timor-Leste.
“Konstrusaun eskola ho métodu tradisionál dala barak presiza tempu naruk. Maibé, liuhosi métodu konstrusaun inovativu ne’e, sala-aula sira bele kompleta iha períodu menus fulan rua. Projetu ne’e uza materiál plástiku resikladu atu produz bloku konstrusaun, ne’ebé sai ezemplu prátiku ba estudante sira kona-ba importánsia sustentabilidade ambientál”, Ministra Edukasaun esplika.
Ministra Edukasaun mós hato’o agradesimentu no apresiasaun ba Primeiru-Ministru Kay Rala Xanana Gusmão, Dreams Asia, Octava Foundation, Classroom of Hope, Direção Nasionál Infrastrutura Eskolár, no komunidade edukativa hotu-hotu ne’ebé kontribui ba realizasaun projetu ne’e.
Ministra akrexenta katak projetu ne’e sei sai esperiénsia inisiál ba Ministériu Edukasaun atu kontinua buka, dezenvolve no aplika modelu konstrusaun eskola inovativu sira, inklui iha planeamentu konstrusaun infraestrutura eskolár iha futuru.
Iha parte ikus, Ministra hato’o apresiasaun ba dedikasaun no kompromisu profesór sira nian iha prosesu aprendizajen, no husu ba komunidade eskolár atu kontinua tau-matan no kuidadu ba infraestrutura foun sira-ne’e, tanba edifísiu ne’e nu’udar rezultadu hosi esforsu no kolaborasaun hamutuk.






