Atividade

Manorin Na’in-19 Remata Formasaun “Kids Athletics” hodi Dezenvolve Desportu Eskolár

DILI, 11 novembru 2026 – Ministériu Edukasaun (ME) liuhosi Diresaun Nasionál Edukasaun Inkluziva no Asaun Sosiál Eskolár (DNEIASE), servisu hamutuk ho Federasaun Atletizmu Timor-Leste (FATL) no Konfederasaun Desportu Timor-Leste (CDTL), ofisialmente taka formasaun prátika “Kids Athletics” ba manorin na’in-19 iha Jináziu Munisipál Dili (GMT), Kuarta (11/11). Formasaun ne’e rasik hala’o durante loron rua hodi kapasita manorin sira iha dixiplina Edukasaun Fízika.

Formadór Irosalino de Jesus Ximenes esplika katak, objetivu hosi formasaun ne’e mak atu dezenvolve abilidade profesór no treinadór sira hodi implementa prátika atletizmu ba labarik sira iha baze.

“Ita hakarak labarik no foin-sa’e sira deskobre ksolok liuhosi movimentu no ezersísiu fíziku. Ne’e promove sira-nia abilidade liuhosi jogu inovativu sira hanesan halai, tuda, haksoit no soe,” dehan Irosalino.

Reprezentante formandu, Meliana Rodrigues de Araujo, husi Eskola Bázika Filiál (EBF) Rumbia Kaikoli, hatete katak nia sente orgulu tanba hetan koñesimentu foun ne’ebé diferente ho prátika baibain iha eskola.

“Ami sente kontente tanba hetan buat foun liuhosi formasaun Edukasaun Inkluziva no ‘Kids Athletics’ ne’e. Prátika ne’ebé ami simu ami sei la rai de’it iha bolsu, maibé sei fila ba eskola hodi fahe no prátika fali ba ami-nia estudante sira,” tenik Meliana.

Iha fatin hanesan, Vise-Prezidente CDTL, José Caetano Guterres, fó parabéns ba formandu sira no husu atu hahú fó importánsia ba investimentu desportu ba labarik sira.

“Ita investe ohin, ita sei ku’u nia rezultadu iha tinan sanulu oin mai. Situasaun desportu agora ladi’ak tanba tinan naruk ita la halo investimentu. Koperasaun entre Ministériu Edukasaun no Federasaun Atletizmu, ho apoiu hosi Federasaun Internasionál, marka pasu importante ida iha istória atletizmu Timor-Leste nian,” nia subliña.