Díli – Loron, Kinta-Feira, 12 Dezembru 2024
Sua Exelénsia Ministra Edukasaun Dra. Dulce de Jesus Soares, partisipa iha fórum edukasaun transformativa ho tema “Edukasaun Kualidade nian ba Paz Sustentável iha Timor-Leste”, hamutuk ho UNESCO, KOICA, CNC no parseiru dezenvolvimentu sira seluk no mós halo lansamentu ba lívru istória Formasaun ba Manorin Disiplina Istória nian Ensinu Báziku Terseiru Siklu no Ensinu Sekundáriu, iha Salaun City 8, Manleuana.
Iha entrevista, Sua Exelénsia Ministra Dra. Dulce de Jesus Soares, hateten, atividade ohin nian, Ministériu Edukasaun servisu hamutuk ho CNC no apoiu husi UNESCO ne’ebé mak hetan mós apoiu husi Governu Korea do Súl (KOICA) hodi realiza forum ida ne’e kona-ba edukasaun transformativa hodi lori edukasaun ida ho kualidade, nakonu ho paz no sustentabilidade ba Timor-Leste, ne’ebé apoiu husi KOICA hodi fó ba Ministériu Edukasaun no CNC hodi hakerek livru istória ba estudante sira husi primeiru to’o terseiru siklu nian.lvv
“Ba dala uluk, ita iha livru istória no livru manuál ba profesór sira, aleinde sira hakerek livru, fó mós formasaun ba profesór sira, tanba ne’e ita fiar katak, ita-nia estudante sira iha tinan mai ne’e, sira iha livru ne’ebé mak ho konteúdu di’ak liu, no livru ne’e rasik hakerek husi matenek na’in timoroan sira”, dehan Ministra Edukasaun.
Governante ne’e hatutan, livru istória ne’ebé mak hakerek husi timoroan sira, halo timoroan sira hatene liután, tanba iha livru ne’e ko’alia kona-ba oinsá mak estudante sira sai ajente ne’ebé bele kuda paz no domin iha rai ida ne’e.
Livru ne’e ohin lansa ona, no Ministériu Edukasaun sei imprimi livru ne’e ba estudante sira hotu no manuál ba profesór sira iha inísiu anu letivu, no garante katak livru sira ne’e sei iha hotu estudante sira-nia liman no sei fó mós formasaun ba profesór sira, no iha preparasaun ba anu letivu mai kona-ba matéria ida ne’e, no mós ba matéria sira seluk ne’ebé agora iha faze preparasaun.
Iha Forum no lansamentu livru ne’e, hetan mós partisipasaun husi manorin sira husi munisípiu idak-idak.
#MédiaME
#JornalistaLuis
