Dili, 08 setembro 2026 – Sua Exelénsia Ministra Edukasaun Dra.Dulce de Jesus Soares hatete, Edukasaun maka misaun no responsabilidade husi profesór ba estudante tanba profesór nu”udar konstrutór ba Futuru.
Lia hirak ne’e hato’o husi Sua Exelénsia Ministra Edukasaun Dra.Dulce de Jesus Soares bainhira hala’o abertura kursu ka formasaun ba profesór bolsa kandidatu sira ne’ebé hetan xamada ba hanorin iha eskola CAFE iha teritorio nasionál.
Lider másima edukasaun ne’e esplika, Serimónia ne’e reflete kompromisu ida hosi Ministériu Edukasaun nian ba futuru Timor-Leste nian no tanba ne’e hetan signifikadu espesiál tebes, tanba reprezenta konkretamente implementasaun polítika estratéjika ida hosi Ministériu Edukasaun nian, ne’ebé konsagra iha Programa Governu Konstitusionál da-IX nian, ne’ebé koloka profesór sira iha sentru prioridade governu nian ida.
“Ohin ha’u hakarak dirije ba imi ida-idak ho mensajen ida ne’ebé klaru tebes: hanorin mak imi-nia misaun no imi-nia responsabilidade. Atu sai mestre ida maka sai konstrutór ba futuru. Ita-boot nia serbisu hakat liu klase, tanba ida-ne’e forma konxiénsia sira, hamoris talentu sira, no orienta dalan sira. Governu fiar ita-boot. Ministériu Edukasaun fiar iha ita-boot. Nasaun presiza imi. No família sira hein dedikasaun, kompeténsia, no integridade husi ita-boot sira”, Ministra Espresa.
Governante ne’e argumenta. Kursu ida-ne’e reprezenta de’it inísiu. Ministériu Edukasaun sei kontinua fó apoiu ba ita-boot sira ho formasaun kontínua, kondisaun serbisu ne’ebé di’ak liu, no polítika sira ne’ebé valoriza profisaun hanorin nian. Maibé depende ba imi ida-idak atu kompromete atu sai ezemplu, atu kuda exelénsia, no atu tau nafatin labarik no foin-sa’e sira iha sentru ba imi nia serbisu.
” Ba profesór na’in 40 ne’ebé ohin prezente iha ne’e, ha’u hakarak dirije liafuan ida ne’ebé espesiál tebes. Ita-boot sira mak grupu profesór foun sira ne’ebé sei asume knaar iha Eskola CAFE sira, hodi lori ho ita-boot sira la’ós de’it koñesimentu ne’ebé hetan iha formasaun ida-ne’e, maibé mós responsabilidade atu kontribui ba kualidade edukasaun iha komunidade sira ne’ebé ita-boot sira sei hala’o ita-boot sira-nia misaun”, Tenik Ministra
Nune’e iha formasaun ne’e tomak, ita-boot sira sei iha oportunidade atu komprende di’ak liután funsionamentu no organizasaun Eskola CAFE sira nian, no mós sira-nia regra, prosedimentu, no espesifisidade sira. Koñesimentu ne’e sei reforsa liuhosi orientasaun no aprezentasaun sira ne’ebé fó hosi Jestór CAFE sira, ne’ebé sei akompaña ita-boot no pasa informasaun esensiál ba ita-boot nia integrasaun iha eskola sira.
Enkuantu iha atividade importante ne’e, hetan partispasaun husi Sua Exelénsia Ministra Edukasaun Dra.Dulce de Jesus Soares, Prezidente Komisaun Funsaun Públika Sr. Agostinho Letêncio de Deus, Prezidente INFORDEPE Sr Domingos Martins, dirijente no profesór kolakadu sira.
