vise-ministra edukasaun vizita estudante iha portugal

Vise-Ministra Edukasaun no Kultura Dra.Lurdess Bessa partisipa iha reuniaun hanaran “ASOSIASAUN TANE TIMOR” iha Porto, Portugál. Iha reuniaun ne’e Vise-Ministra hetan koñesimentu klean liu kona-ba situasaun no realidade sidadaun timoroan ne’ebé maka hala’o hela estudu no servisu iha rejiaun Porto. Hafoin ne’e Vise-Ministra mós halo vizita ba iha estudante timoroan ne’ebé hela iha sidade Mirandela Portugál, hodi haree mós situasaun estudante sira nian iha rejiaun refere hodi haree adaptasaun estudante sira ba iha hela fatin. Aléinde halo vizita ba iha rejiaun rua ne’e, ho antuziasmu estudante timoroan ne’ebé maka estuda iha rejiaun Tondela, Portugál simu vizita husi Vise-Ministra Edukasaun no Kultura Lurdes Bessa iha loron 22 fulan Novembru tinan 2017.

Durante vizita, estudante sira haktuir kona-ba situasaun ne’ebé maka sira hasoru, liu-liu relasiona ho dezastre naturais hanesan, ahi han rai, ne’ebé maka bele fó impaktu ladun di’ak. Situasaun refere maske la afeta ba estudante sira maibé estudante sira dezloka ba hotu iha fatin Bombeiros nian, hodi okupa kuartu sira iha ne’ebá. Iha fatin hanesan Vise-Ministra Edukasaun no Kultura Timor-leste ne’e mós sente orgullu ho estudante timoroan sira tanba ho natureza badinas ne’ebé maka sira iha, sira mós tulun Bombeirus sira atu hala’o sira nia knar ho di’ak liu husi ajuda populasaun sira dezloka ba fatin seguru hanesan indika tiha ona. Attitude sira ne’e sai mós hanesan ezemplu di’ak no exelente reprezentasaun nasaun Timór. Liu husi atidude sira ne’e maka kuaze ema barak iha parte Tondela koñese estudante timoroan ne’ebé hela iha rejiaun Tondela Portugal.

Iha loron 21 fulan Novembru tinan 2017 Vise-Ministra Edukasaun Lurdes Bessa hala’o enkontru ho estudante timoroan sira iha Évora Portugál hodi fó korazem ba estudante sira , iha prespetiva ida katak”importante tebes estudante sira estabele dezafiu foun no kumpri tuir méritu, honra no dignidade. “Timor valoriza imi nia sakrifísiu, dook husi imi-nia família no rai hodi mai estuda. Ita-nia rai Timor presiza tebes imi-nia koñesimentu. Timor leste presiza imi”. Dehan Vise-Ministra Edukasaun Dra.Lurdes Bessa.