MEJD HAHU SENSIBILIZA HAHALOK HIJIENE BA PREVENSAUN MORAS COVID-19, NO DISIPLINA IHA ESKOLA SIRA

Dili 10/03/2020, Ministra da Educação, Juventude e Desporto Dulce de Jesus Soares, visita Ensino Basico Farol (EBC) ho Pre - Escolar Sagrada Familia iha loron Tersa, 09/03/2020. Objetivu prinsipal hosi visita refere mak oinsa motiva no bolu atensaun ba Dirijente eskola, Profesor/as, inklui aluno sira atu hatoman-an ho hahalok hijiene.
Tanba importansia hosi hahalok hijiene mak oinsa ita bele prevene ita nia an hosi ameasa virus Corona nebe'e sai surtu bot iha país barak-barak mundu tomak agora ne’e.
“Maneira ida baziku liu hosi hahalok hijiene mak oinsa sempre hatoman-an fase liman regularmente. Tanba bakteria ka moras barak sempre tur iha ita nia liman. Tan ne’e tenki hatoman fase liman uza sanitizer atu nune'e bele prevene bakteria no virus sira,” dehan Ministra Dulce ba Profesor/a no alunu sira.
Iha eskola hanesan Ministra Dulce mos husu ba Dirijentes no Profesor/a sira atu kontrola estudantes sira ka kria sansaun (positivu) ruma, atu nune’e bele prevene estudante sira la abandona aula aprendijazen.