Ikan lanu Estudante 465 na’in 49 grave


Tuir informasaun husi parte ospitál, husi totál estudante 465 ne’ebé evakua ba os­pitál Nasionál, na’in 49 maka grave no tau soru baixa hela iha banku urjénsia, enkuantu sira seluk simu ai-moruk fila ba idak-idak nia uma.

Diretór Eskola EBC 30 de Agostu, Filomeno Salsinha, haktuir ba journalista sira iha EBC 30 de Agostu Comoro Dili katak, baibain estudante sira hán iha tuku 10:00 Am, horiseik ne’e derre­pente de’it iha tuku 10:30 Am estudante sira he­tán ona sintoma, balun isin katar, oin mean, no balun muta.

“Tanba ne’e ami halo kedas intervensaun kahur masin midar ho bee, nu’u been, no mós ami fó ho susu been, hodi hein Doutór sira,” haktuir Filomeno.
Estudante totál 465 ne’e kompostu husi klase 1 no klase 3 ne’ebé maka eskola iha primeira turma ka eskola dadeer.

Vise Ministra Ensinu Pré-eskolár no Báziku, Dulçe de Jesus Soares, tun kedas ba EBC 30 de Agostu hodi hare’e ho matan estudante sira ne’ebé hetan moras.

Vise Ministra hateten tan katak, parte hotu labele dún ba malu iha situasaun emerjénsia ne’ebé la­barik sira tenki hetan salva lalais. Nia dehan tan katak, hein parte laboratórium ospitál, maka fó rezultadu katak tambasa maka aihan merenda eskolár bele lanu estudante sira.

“Ha’u lakohi ita hotu-hotu dún ba malu, hela de’it rezultadu husi laboratórium maka hatene loos,” sublinã Dulçe ba jounalista sira iha EBC 30 de Agostu tersa (14/10).
Nune’e mós negosiantes ikan ne’ebé maka hatama ikan iha EBC 30 de Agostu, Aguida Amaral ha­teten, nia maka hatama ikan ba eskola, la’os nia maka ba husu, maibé fornesedóre sira husi eskola maka ba husu hodi hatama ikan.

“Ha’u la’ós foin fa’an ikan, ha’u “langganan” maka ihaPantai Kelapa, ne’ebé horiseik senhora ida ba iha ha’u-nia uma husu ba ha’u dehan mana aban ita-bo’ot hatama ikan ember rua nian, ne’ebé hor­seik ha’u rasik maka hatama ikan mai iha ne’e, no ha’u rasik maka hatama ikan iha jeleira sira nian, ha’u mós dehan kedas ba sira tenki tau tan jelu fatuk husi leten ba,” nia tenik.

Nia hateten, ikan ne’e antes atu hatama ba jeleira laran, señora Aguida Amaral haruka sira fase ikan ne’e halo mó’os, i nia rasik mak hatama ikan ne’e ba jeleira laran, depois nia dehan tenki tau tan jelu fatuk iha nia leten, tanba aban maka foin te’in.

Ikan ne’e, ikan fresku, ha’u nia la’en mak ba pezka lori mai, ne’e be ikan ne’e fresku hela, ne’e be laiha ikan ida maka aat, ikan diak, ikan ne’e maka agora dadauk ne’e fa’an iha tasi ibun Pantai Kelapa Dili.

Relasiona ho akontesimentu ida ne’e, Diretóra ser­bisu Distritál da Saúde (SDS), Agostinha da Silva Seguradu, promete nia parte sei halo kontaktu ho sentru saúde Komoro Dili atu delega ekipa ida hein iha eskola refere hodi halo antisipasaun.

Agostinho hateten bainhira tun direta ba fatin akontesimentu iha eskola 30 de Agostu. “Ekipa saúde tenki hein iha ne’e atu antisipa,”