Ministra Educação, Juventude e Desporto (MEJD), Dulce de Jesus Soares, konvoka ona enkontru kordenasaun serbisu ba dahuluk nian ho Dirijenti sira MEJD nian ba tinan 2020.

Dili, 09/01/2020: Excia. Ministra Educação, Juventude e Desporto (MEJD), Dulce de Jesus Soares, konvoka ona enkontru kordenasaun serbisu ba dahuluk nian ho Dirijenti sira MEJD nian ba tinan 2020. Enkontru ne’e realiza iha Salaun Enkontru MEJD, Villa Verde, Dili (08/01/2020).
Iha enkontru ne’e Ministra agradese ba serbisu di’ak ne’ebé hala’o hosi Diresaun sira. MEJD nia serbisu diak ne’ebe atinje ona iha tinan 2019, hatudu liu hosi ezekusaun orsamentu MEJD nian ne’e atinje 98.4 %, nu’udar indikador prinsipal ida. Ministra Dulce mós informa kona-ba ajenda diskusaun Orçamento Geral Estado (OGE) tinan 2020, ne’ebé sei hahú nia sesaun debate jeneralidade iha loron 15 janeiru 2020 mai, nune’e durante fulan janeiru MEJD (VIII Governu) sei utiliza Orsamentu Duodesimu. Tanba ne’e Ministra Dulce husu Dirijenti sira atu prepara planu ezekusaun ba Orsamentu Duodesimu nian.
Ministra mós husu ba Diresaun sira atu prepara kalenderizasaun ba planu atividade ba ezekusaun OGE 2020, nune’e wainhira OGE 2020 bele ezekuta tuir kalendáriu ne’ebé prepara ona. Dulce mós husu Dirijenti sira atu prepara antes dokumentu sira ne’ebé fó suporta ba Ezekusaun OGE 2020 nune’e bele ivita implikasaun ba ezekusaun.
Dulce mos ba Diresaun sira tenke aprezenta planu atividade, nune’e atividade hosi diresaun sira bele hetan kobertura hosi mídia tanba atividade MEJD barak liu maka realiza hosi Diresaun sira ne’ebé presiza mídia nia Kobertura nune’e públiku bele akompaña.