EB Públika Filiál Busira, Sub Distritu Iliomar kondisaun aat


Eskola Ensinu Báziku Filiál púb­liku (EBF) Suku Busira, Sub-Dis­tritu Iliomar, Distritu Lautem kondisaun sei aat, kadeira no meza la sufisiente, livru la sufisiente atu hala’o pros­esu aprendizájen ho kualidade.

Lia hirak ne’e hato’o husi koorde­nadór EBF Busira, Alexandre Serba Roza loron 09/09/2014 iha edifísiu EBF Busira, Iliomar.

Nia argumenta katak, Kadeira ho meza ne’ebé oras-ne’e alu­nu- sira uza, ne’e husi kompaña óliu Pezadu hamutuk 60. Maka alunu sira uza hodi tuir prosesu aprendizájen lorloron.

Eskola ida ne’e iha Sala hamutuk 6 maibé, kadeira ho meza sira uza bá sala 3 de’it, tanba kadeira ho meza lato’o entaun la sufisiente ba alunu sira no barak maka sei tuur nafatin iha rai leten.

Total alunu iha eskola EBF Busira hamutuk 213. alunu mane hamu­tuk na’in 95, alunu feto na’in 118. Profesór hamutuk na’in 6. per­manente na’in 5 no kontratadu na’in 1.
Aléin kadeira meza no sala aula, eskola ne’e mós enfrenta falta livru. “Livru ne’ebé alunu sira uza la to’o mak hanesan Matemátika, Portugés, Estudo do Meio.

Ho ida ne’e alunu ho profesór sira husu ba Ministériu Eduka­saun atu hadia sira-nia eskola, tanba falta sala aula ba sira-nia prosesu aprendizájen hanesan, meza, kadeira, livru, armáriu seluk tan mak eskola ne’e presi­za, liu-liu ba uma, tanba eskola ne’e didin de’it ho bebak, iha laran mós rai út barak no iha tempu udan tahu dodok tan fó impaktu makaas ba estudante sira mai tuir aprendizájen iha eskola.

Koordenadór EBF ne’e hatutan tan katak, profesór sira hanorin iha eskola, ho dalen portugués, no Tetun. No mós dalaruma alunu sira balun la kumpriende profesór sira tama ho lian materna, atu nune’e alunu sira bele kumprende liu-tan kona-ba lian portugés no Tetun liu husi lian Inan.
Merenda eskolár mós la’o ho díak. Durante labarik sira hán etu ho modo ta­han no na’an troka malu ho produtu lokál hanesan aifa­rina, fehuk, talas no seluk tan.