MEJD APOIU KOMEMORASAUN LORON NASIONÁL 12 DE NOVEMBRU.

MEJD/Vila-Verde, 05/11/2018.

Ministra Dulce de Jesus Soares no Vice-Ministru Edukasaun, Juventude no Desportu João Zacarias Freitas konvoka enkontru ho Komisaun Organizadora ba selebrasaun loron historiku Masakre Santa Cruz, hodi koordena servisu ne’ebé komisaun organizadora ba eventu ne’e prepara ona.

Liu husi Sekretáriu Estadu Juventude no Desportu, MEJD fó nia apoiu ba selebrasaun ne’e ho total orsamentu hamutuk 27.909,9.00 dolar amerikanu, nune’e mós MEJD apoiu ho transporte ne’ebe sei fasilita hodi transporta juventude no estudante sira ne’ebe partisipa iha eventu reflesaun kalan no selebrasaun loron masakre nian.

Atividade sira ne’ebe komisaun organizadora perpara ba eventu ne’e mak hanesan, reflesaun ba Saudozu Sebastião Gomes nia loron mate, ne’ebe mak hala’o tiha ona iha loron 27 no 28 Outubru, no reflesaun ba loron masakre ho komemorasaun ba masakre Santa Cruz ne’ebe sei hala’o iha loron 11 no 12 Novembru. Realizasaun ba atividade ne’e rasik fahe ba parte rua maka ba Masakre ne’ebe organiza husi Komisaun 12 de Novembru no loron Juventude ne’ebe organiza husi Parlamentu Foin sa’e.

Hatán ba rekomendasaun husi Prezidente komisaun organizadora Januario de Jesus ho kodigu Dadur hamutuk ho nia vice no ekipa tomak, husu atu iha loron 12 de novembru fo orientasaun ba estudante no profesór sira hodi partisipa másimu iha serimónia ne’e. Ministra Edukasaun, Juventude no Desportu fo poder tomak ba Vice-Ministru atu fo orientasaun ba Diretór Jeral nune’e bele halo sirkular ba loron komemorasaun Masakre Santa Cruz.

Nune’e Vice-Ministru iha enkontru hamutuk ho direjente MEJD nian fo orientasaun atu koordena no organiza estudante ho profesór sira hodi partisipa no fo apoiu másimu ba eventu refere. Tuir Vice Ministru João Zacarias Freitas hateten atividade ne’e rasik iha ligasaun ho MEJD, tambá atividade ne’e rasik mai husi juventude ba juventude tomak ne’ebe edukadu hodi perpara ba futuru nasaun ida diak liu.

Red.Gab.VMEJD