INAUGURASAUN ESKOLA SANTA ÚRSULA BAUCAU.

Vila-Nova/Baucau, 10/11/2018.
Vice-Ministru Edukasuan, Juventude no Desportu nu’udar mós Sekretáriu Estadu Formasaun Profesionál no Empregu Interinu João Zacarias Freitas hamutuk ho Bispo Dioseze Baucau Dom Basílio do Nascimento hala’o inaugurasaun ba Edifisiu Ensinu Bazíku Eskola Sta. Úrsula Baucau. Nune’e mós direitamente asina plaka no tesi fita hafoin Dom Basílio fo bensaun ba eskola refere.

Eskola Sta. Úrsula hanesan eskola privada Egreja Katolika nian ne’ebe funda husi kongregasaun Madre sira husi Fundasaun Santa Úrsula Baucau rasik, ne’ebe nia provinsial ba Timor-Leste no indonézia iha Jakarta-RI.

Serimónia ne’e mós partisipa husi Madre Superiora Agatha Linda Chandra, OSU, Provinsial Ursulin RI-RDTL nian, Embaixador Indonézia ba Timor-Leste Sahat Sitorus ne'ebe akompaña husi nia espoza, Pe.Parokia Vila Nova Baucau José Gonjaga, Autoridade Siguransa komadante PNTL no FFDTL munisipiu Baucau, Prezidente KONEKTIL Pe. Francisco Pinhero da Silva, Presidente Fundasaun Sta. Úrsula Madre Herimina, Koordenador eskola Sta. Úrsula Madre Caroline Suryati ho estrutura tomak, Madre sira husi kongregasaun seluk ne’ebe hala’o misaun iha Munisipiu Baucau nian, profesór sira, estudante, Inan-Aman no Komunidade Parokia Sagrada Kurasaun de Jesus Vila-Nova Baucau.

Eventu ne'e, ba-dahuluk hahu ho Misa Agradesementu ne’ebe prezide direita husi Bispu Dom Basílio do Nascimentu. No ba nia Serimónia ne’e organiza direita ba fundus no preparasaun husi inan-aman sira liu husi komisaun ne’ebe koordena husi Augusto Pires husi Conselho dos Pais

“Filozofia Santa Úrsula nian ne’ebe hateten Serve Bem Amante, fo fiar mai hw katak fundasaun Sta. Ursula iha komitmentu bo’ot atu serbi’i ita nia oan sira ho domin, serbi’i liu husi fornese edukasaun ho kualidade ne’ebe rezulta ona iha oan sira nia aprezentasaun sira ne’ebe sira hatudu iha serimónia ne’emak hanesan Dansa Kultural, Teatru, Puizia,Musica no seluk tan” hato’o husi Vice-Ministru Edukasaun, Juventude no Desportu João Zacarias Freitas iha ninia diskursu. Nia hatutan tan katak, hanesan hakerek ona iha tema ba serimónia ne’e “Dame Hela iha uma Ne’e”, ho nune’e nia husu ba estudante no Inan-Aman sira atu agradese ba Fundasaun St. Úrsula tambá oferese ona uma ne’ebe lori naroman Kristu nian iha rai Baucau ba ita nia oan sira.
João Zacarias refosa tan katak atu garante kualidade iha eskola ne’e maka nia husu ba inan-aman no estudante sira atu akompania fundasaun hodi kuidadu eskola ne’e hanesan uma ne’ebe persiza ita nia domin hodi kuida ho diak, garante ambiente ne’ebe mos no matak nakonu ho jardin ne’ebe hafurak eskola nia oin no estudante sira persiza estuda no aprende, labele tauk atu hakat ba oin no labele tauk atu monu, tamba esperiénsia hatudu ona katak monu dala ida sei hamrik hikas rihun ida ba oin, hamrik no hateke ba leten hodi dehan hau sei ba kaer fitun iha lalehan. Ho lian viziñu nian katak kegagalan adalah kesuksesan yang tertunda, berdirilah dan railah bintang di langit.

Iha sorin seluk Bispu Dom Basílio husu atu halo refleksaun ba situasaun ne’ebe uluk eskola oituan no matenek mós oituan maibe ema edukadu, ohin loron matenek barak maibe sabraut nafatin. Ho nune’e Dom Basílio hateten persiza halo diferensia oituan entre Instrusaun no edukasaun. Instrusaun katak haruka ema hatene hakerek, le, halo konta no kria, maibe edukasaun katak hanorin ema atu moris hamutuk ho ema no hatene tau nia an iha nia fatin. Ho nune’e maka husu ba profesór sira atu fo konstrusaun ne’ebe adekuadu ho edukasaun ne’ebe kualidade.

Iha diskursu Madre Superiora Provinsial Ursulin RI-RDTL nian Agatha Linda Chandra motiva estudante no Inan-Aman sira ho liafuan murak hodi hateten Naroman mai husi Loron Matan Sa’e, ida ne’e mak mehi ne’ebe mosu ohin sai realidade, nu’udar Maromak nia misaun hodi hafanun Úrsulin atu hamosu naroman ne’e liu husi dalan hari’i fundasaun ba iha setor edukasaun, mak ohin iha Timor-Leste liu-liu Baucau hamrik ona uma ho fasilidade diak ne’ebe bele kria naroman ida ba Timor-Leste.

Presidente Fundasaun Úrsula Madre Hermina Hateten Eskola Úrsula hakarak konvida Inan-Aman no parte hotu atu partisipa iha serimónia agradesimentu ne’e laós tambá konvite, maibe tambá nu’udar família Sta. Úrsula ne’ebe interese atu prepara futuru ba nasaun Timor-Leste espesial ba rai doben Baucau.
Vice-Ministru Edukasaun, Juventude no Desport João Zacarias Freitas mós lahaluha hato’o nia agradese ba Embaixador no Madre sira husi provinsial Santa Úrsula ne’ebe fo ona domin no lolo liman ba timor nia oan sira ne’ebe sai Timor nia futuru iha aban bain rua.