“Preservasaun Memória Pasadu no Arkivu Hanesan Justisa Istória”


Diskursu Ministra da Educação, Juventude e Desporto
S.E. Dulce de Jesus Soares Ba Komemorasaun Aniversáriu Relatóriu Chega! Dala-13
Salaun Konferensia CNC, Dili, 30 Outubru 2018
Excia. Membru sira Konsellu Asesória Internasionál CNC nian;
Excia. Reprezentante sira hosi CAVR no CVA;
Excia. Xefe Ezekutiva CNC, Dr. Hugo Fernandes, no Komisáriu CNC sira;
Hau-nia respeitu tomak ba Representante Veteranu no sobrevivente sira;
Excia. Karus Membru VIII Governu Konstitusionál;
Ba entidade Sosiedade Sivíl sira Timor-Leste no Indonézia nian;
Jornalista/reprezentante insitituisaun média públiku sira;
Doben estudante no Profesór sira no Povu Timoroan mak ha’u hadomi.
Iha João 8.32, nia dehan: Ita sei hatene lia-loos, no lia-loos ne’e sei liberta ita” CHEGA nia misaun mak ne’e – simples liu. Atu kore ita hosi buat aat hotu ne’ebé akontese ba ita iha ita-nia pasadu, hodi ita hotu bele moris ho hakmatek, toleránsia no respeitu ba malu. No atu ita hotu iha biban atu hatene loloos ita-nia istória, hodi valoriza ita-nia nasaun no kultura, no mós atu aprende hosi sala sira uluk nian, atu prevene halo sala hanesan de’it no la’o ba oin iha dalan di’akliu. Tan ne’e ohin ha’u sente onra boot tebes bele mai hamriik iha Ita-Boot sira-nia oin, hodi reprezenta VIII Governo Constitucional Timor-Leste nian no loke komemorasaun ida-ne’e.
Ohin loron ita komemora Aniversáriu Relatóriu Chega! ba dala 13 nian, nu’udar Mandatu sagradu ba Centro Nacional Chega! (CNC) hodi implementa rekomendasaun sira hosi Comissão de Acolhimento, Verdade e Reconciliação de Timor-Leste (CAVR) no Comissão da Verdade e Amizade (CVA) – Per Memoriam Ad Spem.
Hanesan ita hotu hatene, estabelesimentu CNC nu’udar rezultadu hosi advokasia tempu naruk, ne’ebé hala’o ona hosi grupu sosiedade sivíl sira, nu’udar meius hodi fó-hanoin ba governu hosi nasaun rua nia obrigasaun atu implementa abranjímente rekomendasaun Comissão da Verdade nian. Nu’udar resposta konkretu ba esforsu kolektiva ne’e mak, iha selebrasaun tinan 10 ba Relatóriu CAVR, Chega! iha tinan 2015 liubá, S.E. Primeiru-ministru Rui Maria de Araujo, estabelese kedas CNC liuhosi Dekretu Lei Númeru 49/2016.
Ha’u hakarak hato’o definitivamente iha-ne’e katak Ministériu Edukasaun, Juventude no Desportu haree ami-nia kompromisu sira relasiona ho CHEGA ho sériu tebes, no haree responsabilidade ne’e la’ós serbisu todan, maibé nu’udar biban boot atubele hala’o serbisu ho di’ak liután. Karik liu fali Ministériu sira seluk, Ministériu Edukasaun iha responsabilidade boot atu asegura katak ita-nia istória, kultura no valór hanesan sosiedade ida la lakon – no ida-ne’e só bele akontese, wainhira ita-nia oan sira la haluha ita-nia pasadu. Dame, justisa no rona-malu moris hosi komprensaun ba malu, no komprensaun mai hosi koñesimentu no komunikasaun. Hanesan ita hotu hatene, edukasaun hahú iha uma, maibé maioria informasaun ne’ebé ita aprende mai hosi eskola, no eskola iha responsabilidade atu estimula hanoin krítiku no análise, inklui kona-ba ita-nia pasadu. Nune’e, Ministériu Edukasaun tenke kuidadu katak buat ne’ebé labarik sira aprende hakiak duni sira-nia domin no komprensaun ba sira-nia rain no sira-nia pasadu.
Hodi hahú implementa konseitu ida-ne’e, Ministériu Edukasaun iha 2013 hahú prosesu reforma kurrikulár. Prosesu ne’e polémiku, maibé mai ha’u parte importante liu hosi revizaun ne’e mak atu asegura katak hanorin ita-nia istória ho loloos, no ho maneira interesante no interativu ba alunu sira. Ho ida-ne’e CHEGA, antes duké sai CHEGA, ajuda tebes Ministériu. Bainhira Ministériu husu organizasaun sira hotu atu lori matéria mai atu hatama iha kurríkulu, Komisaun pos-CAVR responde kedas hodi lori livru CHEGA! sira hotu mai, no sira sai baze importante ba ita-nia kurríkulu siénsia sosiál, liuliu iha parte istória, direitus umanus no solidariedade. Komisaun ne’e fó lisensa ba Ministériu Edukasaun atu uza sira-nia informasaun, fotos, arkivu, nst. atu dezenvolve kurríkulu no planu lisaun sira, no AKBIIT ho laran-luak revee planu lisaun relevante sira hotu. Nune’e, ha’u espera katak CNC bele konkorda ho ha’u katak kurríkulu iha 1º no 2º siklu realiza duni CNC nia misaun relasiona ho edukasaun.
Maibé Ministériu Edukasaun, Juventude no Desportu la hanoin atu para ho ida-ne’e – integra arkivu CHEGA nian iha kurríkulu ba labarik ki’ik sira mak pasu primeiru de’it. Iha 2019 sei hahú mós revizaun ba kurríkulu 3º siklu no sekundáriu hotu, atu asegura atualiza informasaun no pedagojia, maibé mós atu asegura katak alunu sira sei kontinua aprende atu respeita no valoriza malu, rezolve konflitu, no komprende didi’ak ita hotu nia istória.
Semana hira liubá ha’u enkontru ho Sr. Hugo ho kolega balu hosi CNC, no ami haree katak ideia sira kuaze hanesan de’it. CNC hatene loloos oinsá uza aprendizajen esperiensiál no partisipativu atu halo prosesu ensinu-aprendizajen sai efetivu. Ha’u fó ezemplu 2: primeiru: CNC ko’alia kona-ba halo projetu Transmizaun Memória Interjerasionál, hodi labarik sira bele entrevista ema família no viziñu kona-ba sira-nia parte iha ita-nia istória. Bainhira ami hato’o katak parte importante hosi kurríkulu mak katak alunu sira tenke entrevista sira-nia membru família sira ka ema seluk kona-ba sira-nia esperiénsia rasik durante rezisténsia, ami hotu hateke ba malu hodi hatene katak ami komprende malu 100%. No bainhira maun Hugo hato’o katak CNC sei hahú lori labarik balu atu haree fatin istóriku sira, ha’u haksolok tebes tanba ideia ida-ne’e mós mosu ona iha ha’u-nia ulun-fatuk. Nune’e, ha’u sente MEJD no CNC iha mehi ida de’it, no ha’u fiar katak ami sei kolabora ho malu ho furak loos durante tinan ba tinan, atu asegura katak ita-nia jerasaun foun la haluha ita-nia pasadu. Tan hanesan ne’e sira sei prezerva ita-nia kultura no dignidade nu’udar nasaun. Ha’u bele dehan iha-ne’e katak ami hein de’it versaun finál MoU hosi CNC hodi ami bele asina lalais, no hametin serbisu hamutuk.
Tema jerál ba komemorasaun Relatóriu Chega! tinan ida-ne’e: “Prezervasaun Memória Pasadu no Arkivu Hanesan Justisa Istória” refleta momoos ita-nia dejezu, katak dalan ideál atu haburas no “hametin” memória hosi pasadu ba futuru ida nabilan, mak liuhosi arkivamentu. Tanba liuhosi arkivamentu ne’ebe di’ak mak ita bele prezerva esperiénsia moris nian, nu’udar referénsia hodi promove direitu no valór umanu. Parabens ba CNC, ne’ebé halo arkivamentu ba istória Timor-Leste no Indonézia nian hotu. Arkivamentu ne’e mós importante tebes ba ami iha MEJD, atubele apoia aprendizajen ita-nia oan sira-nian, no halo vivu no dinámiku liután. Parte arkivu nian ami bele aproveita hodi haluan no hadi’a ami-nia sistema IT, hodi bele uza e-learning iha eskola sira. Maibé parte arkivu mak importante liu mak labarik sira rasik, ne’ebé mak arkivu vivu sira ba memória orál, ne’ebé mós passa ba jerasaun ba jerasaun.
Nune’e, dala ida tan ha’u hakarak hato’o parabens no Felíz Aniversáriu Relatóriu Chega! ba dala 13. No hakarak fó agradesimentu espesiál ba asesór internasionál sira-ne’ebé prezente ohin: Prof. David Webster, Professor Marisa Goncalves, Professor Trudy Huscamp Peterson no Professor Akhisa Matsuno, no mós ba sira ne’ebé infelizmente labele marka presensa ohin loron, inklui kolega no belun sira seluk, maibé ami apresia no hadomi nafatin. Ita-Boot sira-nia tulun no apoiu halo atu ami-nia Komisaun bele hetan susesu. Sente orgullu katak ita-nia nasaun Timor-Leste bele tama entre nasaun barak ne’ebé hala’o Komisaun Lia-loos ho susesu – hanesan – Áfrika de Sul, Peru, Rwanda no Guatemala, nst.
I would like to congratulate and wish a very happy 13th anniversary to Chega!. And I would also like to give special thanks to the international board members who have come from four countries to be with us today – Professor David Webster, Professor Marisa Goncalves, Professor Trudy Huscamp Peterson and Professor Akhisa Matsuno, as well as the other board members who unfortunately could not be present today, and all the other colleagues and friends who have supported our Truth Commission and resistance struggle throughout the years. All of your support was crucial for us to achieve our goals of independence, peace and stability, and your assistance vital for our Truth Commission to be a success. We are very proud that our country Timor-Leste can be counted among those countries with successful truth commissions, such as South Africa, Peru, Rwanda, Guatemala, amongst others.
Parabens ba Timor-Leste, viva lia-loos, no liuliu viva dame no respeita-malu iha ita-nia rai doben no mundu tomak! Liuhosi CNC nia obra sira ita haree katak:
“Perdua malu la signifika haluha. Bainhira ita valoriza ita-nia memória pasadu sira ho vontade di’ak no karidade, mak ita sei hakat ba futuru ho esperansa foun.”
Tanba liuhosi hatene lia-loos ita bele perdua malu, no liuhosi atu perdua ne’e ita sai livre.