SINDIKATU PROFESORES TIMOR-LESTE (SPTL) LA’OS OPOZISAUN BA MEJD


MEJD/Vila-Verde, 24/10/2018.
Profesór sira ne’ebé hamahan an iha organizasaun ne’ebé hanaran Sindikatu Profesór Timor-Leste (SPTL) hala’o enkontru ho ba Vice-Ministru Edukasaun, Juventude no Desportu, João Zacarias Soares Freitas, hodi hato’o rekomendasaun no preokupasaun ne’ebé sira enfrenta durante ne’e.

Vice-Ministru João Zacarias hatán ba proposta husi professor sira kona-ba legalizasaún organizasaun SPTL hodi hateten, Konsellu ida ne’e mai husi professor sira ne’ebé nu’udar mós funsionáriu públiku, kontratadú no reklamanté sira, nune’e atu hato’o hanoin konstrutívu sira la-presiza hein tan karta legal ida hodi hato’o preokupasaun sira ne’ebé iha baze enfrenta. Nia husu atu muda pensamentu ida ne’e tambá, hanoin ne’e rasik bele difikulta sira atu fahé informasaun sira ne’ebé liga ho preukupasaun professor sira nian ba iha Ministériu.
Iha entrevista Presidente SPTL, aktual direitor eskola tekniku vokasional Herra Fracisco da Costa Freitas hateten, iha enkontru ne’e SPTL apresenta rekomendasaun ba Vice-Ministru mak hanesan, define loron nasional ba edukasaun, distribuisaun livru manual ba eskola sira, defini estatuto professor kontratadu no reklamante sira, hadia administrasaun rekursu humanus iha nível nasional to distrital, solusiona implementasaun rezime kareira ba professor sira no progresaun ba eskalaun ne’ebé to’o oras ne’e dadaun sidauk hetan konsiderasaun no seluk tan.

Ba jornalista sira Vice-Ministru João Zacarias Freitas hateten enkontru ne’e rasik ho objetivu atu rona preokupasaun sira hotu ne’ebé professor sira hasoru no rona rekomendasaun ne’ebé bele fó tulun ba MEJD atu solusíona preokupasaun hirak ne’e. Hatán mós ba preokupasaun públiku ne’ebé konsidera SPTL hanesan opozisaun ba MEJD.

“Organizasaun ne’e la’ós atu sai opozisaun ba MEJD, maibé mai ho objetivu ne’ebé klaru hodi hato’o professor sira nia problema husi eskola sira hotu. Sira rasik reprezenta professor sira hodi aprezenta preokupasaun sira hotu ne’ebé durante ne’e eskola sira enfrenta iha territóriu laran tomak no hanoin hirak ne’e konsidera nu’udar realidade ne’ebé MEJD hasoru durante ne’e”, Vice-Ministru João Zacarias esklarese.
Red.Gab. VMEJD.