Atu harii edifisiu SKA Manatuto sei iha Prosesu

Sira husi AND nasional, mai sukat ona fatin atu harii edifisiu sentro komunitaria Aprendizajen Manatuto nian. Ba futuru mai, sei tau prosesu aprendizajen eskola ekivalensia nivel 2.

Orsamentu ne’ebe atu halo konstrusaun ida ne’e, mai husi doador Banku Mundial, maibe to’o ohin loron, atividade konstrusaun seidauk realiza.

Husi Ministeriu Edukasaun, liu husi Diresaun Nasional Ensinu Rekorente informa mai katak, prosesu aprendizajen ba eskola ekivalensia nivel 2, tenke hahuu iha tinan ida ne’e. Ne’eduni ami serbisu hamutuk ho Edukasaun Munisipiu Manatuto, sira entrega ona sala 1. Husi Eskola Ensinu Baziku Filial Rentau Manatuto mai ami, atu hala’o prosesu aprendizajen ekivalensia nian.

Ho sala 1 ne’ebe ami hetan ona, ami hamutuk ho Diresaun Nasional, oras ne’e dadaun hala’o hela inskrisaun ba alunus foun ba eskivalensia nivel 2 nian. No bainhira prosesu inskrisaun ne’e ramata, ami kumesa hahuu ona prosesu aprendizajen iha sala laran.

Alunus sira ne’ebe bele rejistra maka, sira ne’ebe abandona eskola hanesan Ensinu premaria no ensinu pre sekundariu sira husi Postu Administrativu, Suku no Aldeia Munusipiu Manatuto nian.

Balun ema kaben na’in, ida ne’e la’os obrigatoriu ba sira. Maibe, ami konsege la’o kontaktu no sosializa programa ne’e ho sira no sira oras ne’e balun iha entuziasmu hakarak duni atu kontinua sira nia estudu iha Sentru Komunitaria Aprendizajen ne’e.

Iha sentru komunitaria aprendizajen ekivalensia nivel 2, Munisipiu Manatuto, professor hamutuk ema na’in 6. Tuir ami nia haree, komunidade Manatuto iha entuziasmu ba programa ekivalensia nivel 2 ne’e, tanba jovem sira iha ne’e barak abandona eskola iha tempu Indonesia. Ne’eduni ohin loron ukun an, sira hakarak kontinua sira nia eskola no hakarak kontribui dezenvolvimentu rai laran.

(João Bosco X. Carvalho/Elaborador)