Díli – Loron, Kinta-feira, 01 Agustu 2024
Sua Exelénsia Sekretáriu Estadu Ensinu Sekundariu Jerál no Ensinu Sekundáriu Tékniku-Vokasionál, Sr. Domingos Lopes Lemos hamutuk ho Prezidente Komisun Funsaun Públika, Sr. Agostinho Letêncio de Deus, Prezidente INFORDEPE, Sr. Domingos Martins hamutuk ho dirijente sira Ministériu Edukasaun nian, partisipa iha serimónia reseisaun ofisiál ba dosente Brazileiru hamutuk na’in 12, iha Salaun UCT Balidi, Díli.
Iha diskursu, Sua Exelénsia Sekretáriu Estadu Ensinu Sekundariu Jerál no Ensinu Sekundáriu Tékniku-Vokasionál, Sr. Domingos Lopes Lemos, hateten, haksolok tebes, tanba bele simu profesór sira husi nasaun Brazil ne’ebé mak hola parte iha projetu pilotu ne’e hodi fó formasaun ba manorin timoroan sira kona-ba programa produtivu ba Ensinu Sekundáriu Tékniku Vokasionál.
“Projetu pilotu ida-ne'e sei implementa husi INFORDEPE, sai nu'udar pasu importante ida ba edukasaun iha ita-nia nasaun. Profesór na'in 12 ne'ebé akompaña ami, ohin lori esperiénsia bo’ot iha área sira ne'ebé fundamentál ba dezenvolvimentu área produtivu sira iha ita-nia rain.
Governante ne’e hatutan, área fundamentál sira iha formasaun ne’e mak hanesan, Konstrusaun Sivil, Kontabilidade, Komérsiu no Sekretariadu, Agribusiness, Produsaun Agrikultura no Teknolojia Informasaun.
Iha fatin hanesan Enkarregada Negósiu Embaixada Brazil iha Timor-Leste, Dra. Rita Cássia Lott Marques, hateten, projetu pilotu kooperasaun ida ne’e ba formasaun profesór sira iha programa produtivu sira Ensinu Sekundáriu Tékniku Vokasionál iha Timor-Leste.
“Kooperasaun edukativu no edukasaun maka área ne’ebé hili husi lider sira ba estabelesimentu kooperasaun ho nasaun belun sira, inklui Brazil, maka opsaun ida atu kontribui matenek iha edukasaun ba futuru ba nasaun nian”, dehan Enkarregada Negósiu Embaixada Brazil.
Objetivu husi projetu pilotu ne'e mak atu kria baze ba habelar no konsolida programa kooperasaun téknika entre governu Timor-Leste no Brazil, atu iha futuru kontinua nafatin formasaun ne’e hodi hasa’e tán manorin no estudante sira nia koñesimentu iha área tékniku vokasionál nian.
#MédiaME
