Díli – Sexta-Feira, 07 Juñu 2024
Ministériu edukasaun liuhusi Diretora Jerál Administrasaun no Finansas Sra. Cecilia Maria Belo de Assis asina kontratu kona-ba konsesoens eskolár ho Fundasaun eskola sira husi Munisípiu Dili, Baucau no Liquiça, iha sala konferénsia Ministériu Edukasaun Vila-Verde.
Hafoin termina asina kontratu Diretora Jerál Administrasaun no Finansas Sra. Cecilia Maria Belo de Assis hateten, Ohin 7 junho 2024 asina kontratu ho fundasaun eskola sira hamutuk sanulu resin haat (14) husi ensinu báziku nian no ensinu sekundáriu kona-ba konsesoens eskolár.
“Klauja ida husi kontratu ne’e mós hateten to’o loron 15 novembru 2024 fundasaun sira tenki rekolla hotu ona dokumentu sira atu bele submete mai iha Ministeriu Edukasaun, nun’e iha loron 15 fulan dezembru 2024 ministériu bele submete ona ba iha Ministeriu Finansas”, dehan DG Finansas.
Dirijente Ministériu Edukasaun ne’e mós husu ba fundasaun eskola sira atu utiliza osamentu sira ho responsabilidade, tanba regra hotu-hotu iha ona kontartu ne’e nia laran no osan ba kada fundasaun la hanesan, tanba bazeia ba númeru estudante, nune’e osan ne’e uza duni ba nesesidade eskola no estudante sira-nian.
Enkuantu fundasaun eskolár sira ne’ebé ohin mai asina kontratu ho Ministériu Edukasaun mak husi Munisípiu Liquiça iha fundasaun 1, Baucau iha fundasaun 2 no Díli iha fundasaun hamutuk 11.
#MédiaME
