MINISTRA EDUKASAUN HALA’O ENKONTRU HO DIRIJENTE SIRA HODI KO’ALIA KONA-BA PREPARASUN PLANU ANUÁL BA OJE 2024
Díli, 13/09/2023 – Ministra Edukasaun Dra. Dulce de Jesus Soares hala’o enkontru ho dirijente sira Ministériu Edukasaun nian hodi halo preparasaun planu anuál Orsamentu Jerál Estadu (OJE) 2024, iha Salaun Konferénsia Ministériu Edukasaun, Vila-Verde, Kuarta-Feira ne’e.
Iha enkontru Diretora Jerál Administrasaun no Finansas Cecilia Assis hateten, liuhusi preparasaun ne’e aban sei reuniaun ho dirijente sira tomak Ministériu Edukasaun nian atu haree halo planu anuál ba OJE 2024 bazeia ba programa IX Governu Konstitusionál nian.
“Orsamentu pakote fiskál ne’e governu seidauk determina hira, maibé ami halo dadaun ona exersísiu ida ne’e, depois envelope fiskál sai mak ami atribui ba diresaun hira mak iha Ministériu Edukasaun ida ne’e bazeia mós ba lei orgánika foun ministériu nian ho programa edukasaun nia iha IX Governu Konstitusionál”, dehan DJ Administrasaun Finansas.
Diretora Jerál ne’e hatutan, aban loron tomak sei iha formuláriu atu dirijente sira haree no sei iha orientasaun husi espesialista timoroan iha Ministériu Edukasaun ne’e atu orienta halo planu ida ne’ebé mak di’ak no kualidade atu bele ezekuta mós ho kualidade iha área edukasuan.
