Díli, Loron Kuarta-Feira, 13 Marsu 2024
S.E. Ministra Edukasaun Dra. Dulce de Jesus Soares partisipa iha sorumutu Konsellu Ministru hodi akompaña aprezentasaun kona-ba potensialidade Komunidade País Língua Portugeza (CPLP-sigla iha dalen Portugés) ba Timor-Leste. Iha sorumutu ne’e Sekretáriu Ezekutivu CPLP, Sr. Zacarias da Costa ko’alia kona-ba istória fundasaun CPLP no Timor-Leste tama hanesan membru nomós misaun, prinsípiu fundamentál no estrutura orgánika ne’ebé kompoin CPLP no destaka mós espasu integrasaun ekonómika rejionál nian ne’ebé abranje Estadu-Membru sira no instrumentu operasionál sira ne’ebé utiliza iha ámbitu CPLP.
“Timor-Leste utiliza ona ho limitadu rekursu disponível sira iha komunidade ne’e, no afirma katak CPLP bele hasa’e kapasidade intervensaun internasionál Timor-Leste nian, bele liuhusi diploma polítika, nune’e mós promove kooperasaun ekonómika no emprezariál, la’os de’it entre Estadu-Membru sira, maibé mós iha mekanizmu integrasaun ekonomia rejionál nian”, dehan Sekretáriu Ezekutivu CPLP. Sekretáriu Ezekutivu CPLP hatutan, presiza reforsa signifikativu ida ne’ebé komplemetár iha planu polítika no finanseiru hodi permite Timor-Leste esplora ninia potensiál hanesan membru iha CPLP.
Enkuantu reuniaun ne'e lídera husi S. E. Primeiru Ministru Kay Rala Xanana Gusmão no partisipa husi membru governu konstitusionál da-9 nian.
