Díli – Loron Tersa-Feira, 29 Outubru 2024
Sua Exelénsia Ministra Edukasaun Dra. Dulce de Jesus Soares, hamutuk ho reprezentante manorin sira husi munisípiu sira hotu inklui RAEOA, kompostu husi Pré-Eskolár, Ensinu Báziku Sentrál no Filiál, Ensinu Sekundáriu Jerál no Ensinu Sekundáriu Tékniku Vokasionál, partisipa iha komemorasaun loron mundiál ba profesór sira ho tema mundiál, “Valorizar a Voz dos Professores: Rumo a um Novo Contrato Social para a Educação”, iha Salaun Ian Martin INFORDEPE, Díli.
Iha diskursu ne’e, Sua Exelénsia Ministra Edukasaun Dra. Dulce de Jesus Soares, hateten, ohin loron, halibur hamutuk la'ós de'it atu rekoñese Mestre sira-nia dedikasaun no esforsu, maibé mós atu fó onra ba misaun ne'ebé sira halo loroloron hodi forma hanoin, fó inspirasaun ho laran hodi prepara jerasaun sira iha futuru ba dezafiu sira iha mundu modernu.
“Ami-nia Mestre ida-idak nu'udar ajente ba mudansa, fonte koñesimentu no pilár apoiu ba ami-nia oan no joven sira. Profesór hotu-hotu nia servisu fundamentál ba dezenvolvimentu ita-nia nasaun nian no ba formasaun sidadaun sira hodi fiar-an, autónomu, krítiku no iha kapasidade”dehna S.E. Ministra Edukasaun.
Governante ne’e hatutan, iha Timor-Leste, sei hasoru dezafiu signifikativu iha setór edukasaun, maibé determinasaun husi Mestre sira atu rezolve obstákulu hirak-ne'e. Mestre sira dedikadu atu kria ambiente aprendizajen inkluzivu no estimulante, iha ne'ebé estudante ida-idak hetan valór no enkoraja atu esplora sira-nia potensialidade.
“Iha loron ida-ne'e, ita mós tenke rekoñese importánsia husi formasaun kontinua no dezenvolvimentu profisionál ba profesór sira. Nu'udar governu no sosiedade, ita-nia devér mak atu asegura katak ita-nia Mestre sira iha asesu ba prátika di'ak, rekursu no apoiu, atu nune'e, sira bele hala'o sira-nia knaar ho dalan di'ak liu. Tanba ne'e, investe iha edukasaun no formasaun ba ita-nia Mestre sira investe hela iha futuru ita-nia nasaun”, dehan S.E. Minitra Edukasaun.
Governante ne’e akresenta, loron Mundial Mestre sira-nian ida-ne'e hanesan oportunidade di'ak ida atu reforsa kompromisu ne'ebé Governu Konstitusional da-9 halo no liuliu Ministériu Edukasaun halo ba edukasaun ho kualidade. Tenke serbisu hamutuk ho governu, instituisaun edukasaun, komunidade, família no Parseiru - atu kria sistema edukasaun ida-ne'ebé la'ós de'it hanorin, maibé mós fó inspirasaun, motivasaun no prepara estudante sira atu sai sidadaun ho futuru ne'ebé naroman.
#MédiaME
