Díli – Loron Tersa-Feira, 22 Outubru 2024
Sua Exelénsia Ministra Edukasaun Dra. Dulce de Jesus Soares no Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos hamutuk ho Dirijente sira Ministériu Edukasaun nian, halo aprezentasaun kona-ba Orsamentu Jerál Estadu (OJE) tinan 2024 no 2025 ba Komisaun G Parlamentu Nasionál, iha Sala Reuniaun Komisaun G Parlamentu Nasionál.
Iha entrvista, Sua Exelénsia Ministra Edukasaun Dra. Dulce de Jesus Soares, hateten, Orsamentu Jerál tinan 2024, atinji ona 73% no balansu sira ne’e planeadu hotu ona no fiar katak antes atu remata tinan ne’e, sei atinji 90% ba leten.
“Nafatin mantein programa lima (5) mak hanesan, rekursu umanu, kurríkulu, infraestrutura, jestaun eskolár no mós edukasaun inkluzivu. Tinan 2024 alkansa rezultadu di’ak tebes, hanesan halo ona revizaun kurríkulu, kontinua halo konstrusaun ba eskola sira, formasaun ba profesór sira no mós atividade oioin ne’ebé mak kontribui hodi hasa’e kualidade edukasaun ”, dehan Ministra Edukasaun.
Governante ne’e hatutan, iha tinan 2025, iha programa lima (5) nafatin, sub-programa 15 no atividade hamutuk 115 no atividade sira ne’e maioria fó kontinuidade ba programa 2024 nian.
Orsamentu 2024 hamutuk 114 milloens inklui konsesoens eskolár ka subsidiu eskolár ba ensinu báziku ne’ebé kobre husi 1⁰ anu to’o 9⁰ anu ne’ebé ezekuta ona 73%. Iha proposta ba 2025 nafatin 114 milloens no orsamentu ne’e purvolta 8 milloens ba konsesoens eskolár ba ensinu báziku passa ona ba orsamentu administrasaun estatal.
Ministériu Edukasaun halo ona pedidu adisionál, tanba sei iha projetu infraestrutura hamutuk 129 ne’ebé husi tinan 2021, tanba ne’e Ministériu tau esforsu bo’ot ida atu finaliza projetu sira ne’e iha tinan 2025.
#MédiaME
