Díli – Loron Segunda-Feira, 28 Outubru 2024
Sua Exelénsia Ministra Edukasaun Dra. Dulce de Jesus Soares, hala’o enkontru kortezia ho delegasaun Southeast Asian Ministers of Education Organization (SEAMEO) hodi ko'alia kona-ba involvimentu nasaun Timor-Leste nian ne'ebé tama nu'udar membru SEAMEO no ko'alia mós kona-ba preparasaun lansamentu relatóriu, ne'ebé sei lansa aban. Enkontru ne’e hala’o iha Sala VIP Ministériu Edukasaun, Vila-Verde.
Iha entrevista ne’e, Sua Exelénsia Ministra Edukasaun Dra. Dulce de Jesus Soares, hateten, atividade ida ne’e foin dala uluk nasaun Timor-Leste hola parte no hein katak rezultadu ida ne’e sei sai fali informasaun ida hodi ba oin bele hasa’e liután kualidade edukasaun liuliu haree fila-fali ba kurríkulu, kualidade manorin, jestaun eskolár no infrastrutura eskola sira.
“Aban dader sei lansa programa “Métrica de Aprendizagem Básica” Sudoeste Asiátiku nian, ne’ebé sei halo teste ba estudante 5⁰ anu ensinu báziku iha área matemátika no literasia, ne’ebé sei hola parte hotu husi nasaun sira Sudoeste Asiátiku nian”,dehan S.E. Ministra Edukasaun.
Governante ne’e hatutan, Ministériu Edukasaun kontente tebes, tanba bele hola parte iha programa ne’e, ne’ebé hetan apoiu bo’ot husi UNICEF hanesan parseiru Ministériu Edukasaun nian tempu naruk ona.
Iha fatin hanesan, Diretora SEAMEO, Dra. Habibah Abdul Rahim, hateten, hakarak fó apresiasaun ba Ministériu Edukasaun ne’ebé bele hola parte ba avaliasaun aprendizajen ida ne’e, hanesan kooperasaun ida ne’ebé mak di’ak tebes atu oinsá bele haree aprendizajen estudante sira nian, liga ba literasia no matemátika.
“Parte SEAMEO nian sei ajuda Ministériu Edukasaun hodi haree fila-fali rezultadu husi avaliasaun, hodi bele suporta ba iha planeamentu no mós bele haree ba kualidade no ekuidade liga ho ensinu aprendizajen nian”, dehan Diretora SEAMEO.
Aleinde ne’e, Reprezentante Deputy UNICEF iha Timor-Leste, Sra. Ainhoa Jaureguibeitia, hateten, UNICEF apresia tebes ba Ministériu Edukasaun, tanba bele hola parte iha avaliasaun dahuluk ida ne’e, ne’ebé hanesan oportunidade baze ida hodi bele hatene situasaun sira no oinsá bele responde, no mós hanesan exersísiu ida ba avaliasaun tuir mai ba tinan 2029 ne’ebé sei priense Objetivu Dezenvolvimentu Sustentavél 2030 nian.
#MédiaME
