Rairobo, Atabae - Loron Sábadu, 21 Dezembru 2024
Sua Exelénsia Ministra Edukasaun Dra. Dulce de Jesus Soares ensera kursu formasaun preparatória ba profesór foun sira ne'ebé integra iha karreira hanorin nian ne’ebé remata ona formasaun durante semana rua nia laran, iha Sentru Formasaun PNTL Rairobo, Postu Administrativu Atabae.
Iha serimónia enseramentu ne’e, Sua Exelénsia Ministra Edukasaun Dra. Dulce de Jesus Soares, hateten, ita-bo’ot sira mak agora sai líder, maske ema foun, maibé ita-bo’ot sira hatudu liuhusi rezultadu ezame, katak bele kontribui ba servisu nobre hanorin nian.
“Sai profesór tenki iha paisaun, la’os buka servisu, tenki iha interese hodi hanorin oan-sira no akompaña sira husi hahú to’o remata, nune’e, ho hakraik-an ha’u husu ba ita-bo’ot sira atu tau responsabilidade maka’as hodi hanorin”, dehan S.E. Ministra Edukasaun.
Governante ne’e mós husu ba manorin sira atu fiar mai Ministériu Edukasaun, hahú simu tomada de posse, sai ona família bo’ot ministériu nian, tanba ne’e kuandu iha buat ruma dehan mai dirijente sira Ministériu Edukasaun nian no lalika ba ko’alia tún sa’e, tanba to’o ikus Ministériu Edukasaun mak sei rezolve ita-bo’ot sira-nia problema.
#MédiaME
