Díli – Loron Tersa-Feira, 29 Outubru 2024
Sua Exelénsia Ministra Edukasaun Dra. Dulce de Jesus Soares no Sua Exelénsia Embaixadora Portugal iha Timor-Leste, Sra. Manuela Bairos, halo asinatura akordu Adendu Segundu Projetu Pro-Portugés nian hodi hametin relasaun servisu bilaterál liuliu iha área edukasaun. Serimónia asinatura akordu ne’e hala’o iha Salaun VIP Ministériu Edukasaun, Vila-Verde, Díli.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, ho respeitu no satisfasaun boot hodi halibur hamutuk ohin iha Ministériu Edukasaun, hodi asina Adendu Segundu Projetu PRO-Portuges, inisiativa ida-ne'ebé reflete komprimísiu ida-ne'ebé forte no progresivu entre Timor-Leste no Portugal hodi hametin relasaun servisu bilaterál sira, liuliu iha área edukasaun.
“Projetu Pro-Portuges, ne'ebé sai ona parte integradu husi promosaun no reforsa Lian Portugés iha Timor-Leste, la'ós de'it hametin relasaun lian, maibé mós estimula koñesimentu, abilidade komunikasaun, autonomia no abilidade lian ba profesór sira iha nivel ensinu hotu-hotu, hahú husi edukasaun pré-eskolár to'o ensinu sekundáriu. Asinatura ne’e, sei estende ba fulan haat tán (husi fulan Setembru to'o Dezembru 2024), sei permite atu kompleta ho susesu prosedimentu no knaar operasionál sira, hodi asegura katak faze dahuluk husi projetu ne'e sei kompleta ho susesu no efisiente” dehan S.E. Ministra Edukasaun.
Governante ne’e hatutan, iha oportunidade ida-ne'e, hato'o apresiasaun boot ba Governu Portugal nia dedikasaun atu hasa'e edukasaun lian portugés iha Timor-Leste, sai nu'udar buat importante ida ba dezenvolvimentu ba konstrusaun iha futuru ne'ebé bele hasa’e edukasaun no formasaun ne'ebé ho kualidade liután ba profesór sira hodi sai nu'udar pilár sentrál ida.
Kolaborasaun ida-ne'e la'os de'it hanesan ezemplu ida husi parseria di'ak entre nasaun maun-alin sira, maibé mós hanesan testemuña ida ba amizade no valór sira ne'ebé fahe. Apresia tebes ba apoiu hotu-hotu ne'ebé fó ona no hato'o fali ami-nia kompromísiu atu kontinua servisu hamutuk ho Portugal, sempre ho objetivu atu hametin sistema edukasaun iha Timor-Leste.
#MédiaME
