Atividade

Governu liu husi MEJD-MS, Lansa Vasina Pfizer

 

27 Outubru 2021, (Sapientia)-Governu Timor-Leste liu husi Ministru Edukasaun Juventude no Desportu (MEJD), Armindo Maia no Ministra Saude (MS), Odete, lansa aimoruk vasina Pfizer ba labarik ho idade husi tinan 12 até menus husi idade tinan 18.

Atividade lansamentu hala’o iha eskola Ensinu Báziku 30 de Agostu Comoro Dili, MEJD Armindo Maia hateten, vasina ne’ebe governu Timor-Leste ho esforsu tomak buka koalia parseiru sira. No ita nia belun sira  tulun ita fó vasina Pfizer mai ita. Hamutuk doze rihun atus ida  atus neen rua nulu husi kooperasaun nasaun Amérika.

Durante ne’e ita hotu hatene katak,  estadu Timor-Leste konsege vasina ona ema boot sira ho astrazeneca no sinovac.  Ne’ebe konsege vasina ona ema na’in rihun atus ualu.

Maibe governu hanoin mós labarik sira. Tanba moras ida ne’’e la’os mai ataka ema boot de’it.  Ne’eduni maka governu esforsu lori vasina Pfizer mai Timor-Leste.

Liliu ba alunus sira no inan ho aman sira,  mai ita hotu apoiu programa ida ne’e. tanba labarik sira sei kiik, presija konsientementu husi inan ho aman sira.

MEJD hein katak, inan ho aman sira  sei bele kontribui. Tanba, hotu-hotu taumatan ba saude diak  ita oan sira. Presija ho resposabilidade tulun sira.

Nuudar Ministru Edukasaun, husu ba manorin sira, inan ho aman sira labele impede oan sira atu simu vasina  nune’e sira bele hetan saude di’ak no bele proteje  husi moras  covid-19.

Embaxador Amerika iha Timor-Leste, iha ninia intervensaun hateten, governu Amerika  hato’o sinseiru no agradesimentu ba governu Timor-Leste,  nia parseria sai tiha ona absolutamente fundamental  iha tempo ne’ebe governu rua servisu hamutuk hodi bele manan hasoru pandemia ida ne’e.

Timor leste sente orgullu tebes ho progresu ne’ebe halo tiha ona to’o ohin loron ho esforsu tomak ba kampaña vasinasaun hasoru Covid-19.

Ohi hakat pasu boot ida  ba oin, iha kampaña ida ne’e. lori povo Amerikanu nia naran prazer ida no fo bemvindo ba chegada primeiru doze  vasina Pfizer. Hamutuk rihun atus ida atus neen rua nulu.  Ida ne’e kontribuisaun  husi Amerika ba povo Timor-Leste.

Amerika fahe vasina Pfizer ne’e  iha Timor-Leste no ba mundu tomak  aktu ida ne’e halo ita sai seguru liu tan. Hanesan Prezidente Amerika Biden katak valorize dignidade eminente ema hotu nian iha tempu susar nia laran.

Embaxador ne’e laiha duvida katak sientista sira iha mundu ne’e ne’ebe dezenvolve vasina ida ne’e sente orgullu katak vasina ne’ebe mosu iha Timor-Leste.  Vasina Pfizer ne’e kria husi Amerikanu sira nia kreatividade,  no inovasaun ne’ebe di’ak liu.

Doze vasina hirak ne’e hanesan de’it.  Ho hirak ne’ebe uza iha Amerika.  Vasina idane’e seguru no afikasia tebes. Importante vasina hirak ne’e oferese oportunidade  ajuda Timor-Leste  manan hasoru Covid-19.  No fila hikas ba sentidu normalidade

Hahu inisiu pandemia, Amerika servisu hamutuk ho nia parseiru sira  husi governu no sosiedade sivil sira iha Timor-Leste  fornese asistensia kritika  ho osan montante milliaun lima pontu  sia, hodi kombate covid-19.

Iha biban ne’e, Ministra Saude, Odete, profunda liu tan katak,  Governu Timor Leste disidi hodi fó vasina Pfizer  ba labarik sira iha Timor-Leste,  ho idade 12 até menus husi idade 18, bazeia ba rekomendasaun komisaun independente NAITA.

Vasina ne’e produs iha Amérika, hetan aprovasaun husi Organizasaun Mundial saude (OMS),  iha loron 31 Dezembru 2020.  Ho idade 16 ba leten. No hetan mós aprovasaun aimoruk Pfizer  ba idade 12 até menus hus husi idade 18 iha fulan Maio 2021.

Estatístika nasional kona ba vasinasaun no Covid-19 timor-Leste. To’o ih semana kotuk, ita rejista kazu konfirmadu Covid pozetivu hamutuk ema na’in 19. 659. Husi total ne’e, kazu ba labarik husi idade tinan 18 mai kraik, 13.661. katak 19%, maka infetadu labarik sira.

Total óbitu  ne’ebe mate iha teritóriu nasional tomak hamutuk ema na’in 121. Husi númeru hirak ne’e, ema idade labarik hamutuk ema na’in 13. Ou 11%.

Tuir péritu siéntísta sira,  katak vasina Pfizer ne’ebe governu prepara hela,  ninia efikasia di’ak, 95% bele proteje  labarik sira husi COVID-19. Labarik sira sei simu dóze rua, hafoin simu dóze dahuluk, no hein  liu loron 21,  maka  sei simu fila fali dóze daruak.

Vasina ne’e kada doze iha 0.3ml. la hanesan ho vasina astrazeneca no Sinovac .

Labarik sira tenke simu vasina nune’e bele proteje husi moras todan  no mate kauza husi moras Covid-19.  Mós bele prevene transmisaun husi komunidade no populasaun universal.  Hudi hamenus posibilidade ba variante foun ne’ebe sei mai. No ataka mós labarik kiik oan sira.

Husu ba inan ho aman sira atu koopera haruka oan sira  ba simu vasina Pfizer. Infermeiru no parteira sira pronto atu fo vasina ba oan sira.

Media. Gab. Min. MEJD: João Bosco Xavier Carvalho

 

MEJD: Governu Sériu Hasoru Covid-19

 

Bobonaro 23 Outubru 2021, (Sapientia)- MInistru Eduksaun Juventude no Desportu, Armindo Maia iha nia kampaña hateten, Governu sériu tebes  hasoru Covid-19 tanba hakarak nia ema labele mate barak ba  moras aat ida ne’ebe hamate ona ema barak iha mundo tomak  inklui sidadaun timor oan 120 mate tanba  moras Corona.

Iha estudante Ensinu Tekniku Vokasional  no Ensinu Báziku Postu Bobonaro sira nia oin, MEJD haruka,  estudante sira  atu informa ba  inan ho aman sira, labele rona informasaun falsu sira ne’e  maibe tenke mai simu vasina. Labele tauk vasina, diak liu tauk  moras. Tanba vasina ne’e atu hasa’e ita nia imunidade  hasoru pandemia global ne’ebe hanaran virus korona.

Ba estudante sira no joven sira hotu labele tauk daun. Governu nia planu atu salva  ninia ema. Lakohi nia ema atu moras, lakohi nia ema atu mate. Lider nasional  inklui lider igreija sira  simu vasina hotu ona.

Liliu ba mestre sira. Permanente no kontratadu, Ministériu Edukasaun Juventude no Desportu, hasai ona sirkular ba eskola sira hotu atu profesór/a sira  ba hanorin, tenke simu vasina kumpletu. Karik seidauk simu vasina, MEJD la autoriza tama eskola hanorin alunus sira.   inklui estudante sira ho idade 18 ba leten, wainhira atu tuir ezame, tenke vasina no hatudu kartaun vasina.

Ba mestre sira ne’ebe sei voluntáriu. MEJD sei loke rekrutamentu maibe, kriteria tenke simu vasina no hatudu kartaun vasina maka bele konkore vaga ne’e. sei laiha tan toleransia ba mestre no mestra sira inklui estudante sira ne’ebe ho idade 18 ba leten.

Ba labarik sira ne’ebe ho idade, 12-17.  Aimoruk vasina  Pfizer to’o tiha ona husi ita nia parseiru nasaun Amerika maka oferese hamutuk doze rihun atus ida atus neen.  La kleur tan sei fo vasina ba estudante sira. Hahu husi Dili, no sei mai to’o Munisipiu inklui area remotas sira hotu.  

Iha fatin hanesan, Ministru Presidensia Konsellu Ministru, Fidelis Leite Magalhães iha nia isklaresimentu katak,  vasina hanesan kakaluk ida ne’ebe  atu satan  ita nia isin  hasoru moras Covid.

Administrador Postu Administrativu Bobonaro, Juvinal Leto Mau dos Santos, atividade kampaña vasinasaun ohin ne’e hala’o ba Suku, Bobonaro no Suku Malilait. Komunidade sira ne’ebe mai atu simu vasinasaun.

Postu Bobonaro iha Suku 18. Ho Aldeia 60. Tanba durante ne’e  númeru vasinasaun iha Postu Administrativu Bobonaro sei kiik hela ne’e maka membru governu sira mai halo kompaña  iha ne’e atu fó informasaun klaru ba populasaun sira atu mai simu vasina.

Tanba durante ne’e komunidade konsumu informasaun  falsu barak mai husi fontes oi-oin katak, vasina ne’e mate, vasina ne’e laiha ona jerasaun, vasina ne’e la hetan oan, boot sira vasina ho  vitamina ne’e maka membru governu na’in rua, Ministru Presidensia Konsellu Minisru, Fedelis Leite Magalhães no Ministru Edukasaun Juventude no Desportu, Armindo Maia mai atu fó informasaun loloos katak  boatus no informasaun sira ne’ebe   husi fontes barak-barak lansa ne’e bosok no falsu.

Hanesan Xefi Postu Bobonaro, apela ba komunidade Suku 18 nian  atu partisipa vasinasaun  nune’e bele hotu-hotu hetan saude diak, labele hetan moras korona, atu hala’o dezenvolvimentu iha seitor  tomak bele la’o diak iha Postu Administrativu Bobonaro

Reprezentante Administrador Munisipiu Bobonaro husu ba komunidade Postu Bobonaro atu kumpri regras ne’ebe iha tanba  saude.  Ema relijioju sira mós preokupa sira nia saude.

Lalika fiar boatus  sira ne’ebe mosu iha postu Bobonaro.  Governu laiha intensaun lohi ninia povu rasik.

Entretantu, populasaun Munisipiu Bobonaro tomak ne’ebe simu ona vasina doze dahuluk, hamutuk 55% no  ema ne’ebe simu ona doze daruak hamutuk 30%.  Kompara ho teritóriu Nasional, Munisipiu Bobonaro, atinji númeru dasanulu resin ida.

Entretantu, vasina ne’ebe hala’o perante kampaña husi Ministériu Edukasaun Juventude no Desportu  hamutuk ema na’in 200, husi Suku Bobonaro no Suku Malilait.

Media. Gab. Min. MEJD: João Bosco Xavier Carvalho

Australia sei Apoiu U$. Miliaun ida Pontu Neen ba MEJD iha tinan oin

 

Dili, 25 Outubru 2021, (Sapientia)-Ministériu Edukasaun Juventude no Desportu hala’o reuniaun ho Embaxador Australia hodi diskuti kona apoiu kooperasaun entre MEJD ho  Australia liu husi DFAT ho Embaxada Australia iha Timor-Leste kona ba  programa PHD.

Hafoin Reuniaun, Ministru Edukasaun Juventude no Desportu, Armindo Maia ba Media sira katak, koperasaun Ida ne’e iha projeitu lubun ida. Ida maka Alma, ne’e apoiu ba lideransa no auditoria ba eskola sira, ida mós kona edukasaun inkluziva. Nune’e mós  kona ba edukasaun multi lingua, no mós apoiu ba Ministériu Edukasaun Juventude no Desporto (MEJD). Liliu kona ba edukasaun Ensinu Báziku.

Kona orsamentu ne’ebe apoiu husi governu Australia, nune’e mós MEJD tau osan hamutuk  atu bele hala’o programa sira ne’e. obiemente governu Timor-Leste mós tenke tetu katak,  programa ida ne’e to’o tempu ida sei ramata, entaun MEJD mós tenke haree ninia sustentabilidade.

Programa idane’e ninia vantajem boot labarik timor oan sira, tan ba ne’e Ministériu desidi hori uluk kedas atu servisu hamutuk ho governu Australia bele reforsa seitor edukasaun.

Australia nia koperasaun ho Ministériu Edukasaun Juventude no Desportu,  iha tempo naruk  ona. Tinan oin, Australia sei apoiu tan US Dolar Amerika hamutuk  milliaun ida pontu neen ($.1.6). la’os ajuda deit maibe kona ba kooperasaun.

Hau kontente tebes kona ba  asina akordu ida ne’e,  tanba Australia la’os  apoiu de’it. Ne’e bele  koalia ba malu, halo diskusaun no halo planu hamutuk atu oinsa uza Australia nia kooperasaun, Australia nia orsamentu atu servisu hamutuk  ho Ministériu Edukasaun Juventude no Desportu iha Timor-Leste.

Media. Gab. Min. MEJD: João Bosco Xavier Carvalho

 

 

MEJD Ho Parseiru sira hala’o Hand Over Livru ba 30 siklu hamutuk 90.108

 

Dili, 25 Outubru 2021, (Sapientia)-Ministériu Edukasaun Juventude no Desportu (MEJD) hamutuk ho Embaxador Korea iha Timor-Leste, Kim Jeong Ho. Reprezentante COICA, Reprezentate ONU, Sr. Roy Trivedy.  Reprezentante  UNESCO, no UNICEF hala’o Seremónia hand over, livru  rihun sia nulu atus ida  ualu (90.108), ba estudante 30  siklu. Iha salaun MEJD Vila Verde Dili.

Livru ne’e, kona ba oinsa atu estuda no hanorin Siénsia no Matematika ba estudante sira inklui ba profesór sira mós.

Ida ne’e ajuda boot teb-tebes mai Ministériu Edukasaun Juventude no Desportu, liu husi belun sira husi nasaun Korea, atraves husi ajensia COICA inklui apoiu husi parseiru sira seluk  hanesan UNESCO no UNICEF mós.

Livru   sai prioridade tebes. Felizmente  MEJD seidauk  produs livru barak ba alunus sira maibe, iha mehi ida katak, MEJD sei oferese livru ba estudante sira, alunu/a ida, livru ida.  Atu sira bele estuda iha uma.

Tanba ho pandemic COVID, entaun asesu internet mós susar, eletrisidade mós dala barak labele. Entaun livru ne’e labarik sira bele estuda iha uma. Livru sira  ne’ebe ohin hand over ne’e, distribui tiha ona.

Kona ba livru ne’ebe durante ne’e difikulta estudante sira estuda iha uma, Ministru Armindo Maia esplika katak, durante ne’e MEJD produs ona livru balun  maibe, Seidauk Atinji metas ne’ebe iha. Tanba ne’e molok mandatu ramata, sei halo buat balun tan mesmu la konsege 100% maibe, pelumenus 75% kona ba livru ita bele resolve.

Entretantu, iha seremónia hand over, Ministru Edukasaun Juventude no Desportu, DR. Armindo Maia, hato’o agradese wa’in ba povo Korea liu husi Embaxador Korea iha Timor Leste, hamutuk ho nia ajensia COICA ne’ebe ho laran luak tebes ajuda ona MEJD, atu hasa’e kualidade edukasaun iha Timor-Leste laran tomak.

Media. Gab. Min. MEJD: João Bosco Xavier Carvalho

 

Hafoin Kampaña Covid-19 iha Suku Kolimau, MEJD Kontinua Hala’o Obervasaun Edifisiu EBF Kolimau

 

Kolimau, Bobonaro, 21 Outubru 2021, (Sapientia)-hafoin kampaña Vasinasaun Covid-19 iha Suku Kolimau, Ministru Edukasaun Juventude no Desportu, Armindo Maia, aproveita tempu, ba vizita Eskola Ensinu Báziku Filial Kolimau.

Objetivu vizita ne’e atu haree besik liu kondisaun fíziku Eskola EBF Kolimau nian. Nune’e MEJD bele halo planu halo rehabilitasaun ou halo konstrusaun. Karik eskola ne’e kondisaun aat grave. Maibe, hafoin halo observasaun kondisaun eskola Ensinu Báziku Filial, (EBF) Colimau estavel, mesmu edifisiu ida maka kondisaun nakfera, dala ruma estrutura ladun metin ou bee maka iha okos ne’ebe ita haree parte estrutura balun hahu naksobu.  maibe sei bele uza dura tempu tinan 5 mai tan.

Iha fatin hanesan Koordenadora, Eskola Ensinu Báziku Filial primeiru no segundu siklu Colimau, Postu Administrativu Bobonaro, Fernanda de Jesus,  sente orgullo no agradese tebes ba Ministru Edukasaun Juventude no Desportu, Armindo Maia, ne’ebe mai vizita ami nia eskola.

Eskola EBF Colimau ninia alunus hamutuk  ema na’in 246. Husi primeiru ano até sextu ano.  Profesór hamutuk ema na’in 7. Permanente  ema na’in 5, no kontratadu ema na’in 2.

EBF Colimau, nia sala hamutuk 6.  Entre sala neen ne’e, sala tolu kondisaun diak, no sala toluk seluk kondisaun aat.  Kona ba kadeira no meza, la to’o ba ami nia alunu sira. Tanba kadeira no meza  ne’ebe agora ejiste hamutuk zogo 120. Ne’e ba alunus nian de’it. Kadeira no meza ba profesór sira laiha. Uza hamutuk ho alunus sira nian de’it.

Eskola ho kondisaun minimu  kadeira no meza hanesan  ne’e, husu ba Ministériu Edukasaun Juventude no Desportu atu apoiu tan kadeira no meza mai. Nune’e alunus sir abele tuur hotu tuir prosesu aprendizajem ho di’ak. Eskola EBF Colimau sei presija tan kadeira no meza hamutuk zogo 120 tan.

Eskola ne’e hariis fatin no sentina laiha. Inklui bee mós  laiha.  Wainhira  eskola inplementa programa meranda, eskola obriga alunus sira lori bee husi uma mak mai  te’in iha eskola.  Kona ba produtu ne’ebe halo ba merenda, tanba produtu local la sufisiente entaun eskola desidi sosa fós, modo husi loja mai te’in ba merenda escolar.

Ba livru manorin sira, kumpletu no livru ba alunus sira mós kumpletu. Kona ba preparasaun ba ezame, koordenador ne’e informa kaak, eskola preparadu nafatin tanba  durante ne’e prosesu aula la’o normal hela.  

Media. Gab. Min. MEJD: João Bosco Xavier Carvalho

 

Urjentemente MEJD sei harii Edifisiu Pré-Eskolár Kolimau

Colimau, Bobonaro 21 Outubru 2021, (Sapientia)-Ministru Edukasaun Juventude no Desportu, Armindo Maia hafoin vizita edifisiu EBF Kolimau, inklui sala aula pre-eskola Kolimau, ba Sapientia katak, urjentemente Minisériu Edukasaun Juventude no Desportu sei koordena ho Ministériu Estatál,  atu harii edifisu ba ensinu Pre-Eskolar iha Suku Kolimau, Postu Administrativu Bobonaro, Munisipiu Bobonaro. Tanba pre-eskolar ne’e dezentraliza ona  ba iha Munisípiu.

Dadaun ne’e,  pre-eskola Kolimau seidauk iha edifiusiu rasik no sei uza hamutuk edifisiu EBF Kolimau. Númeru alunus ne’ebe eskola iha  pre-eskola Kolimau hamutuk ema na’in 37.

Media. Gab. Min. MEJD: João Bosco Xavier Carvalho

 

Pesquisa