Ministério da Educação, Juventude e Desporto prepara detalle sira kona-ba reativasaun prosesu aprendizajen prezensiál

Comunicado Imprensa Acessos: 4326

KOMUNIKADU IMPRENSA

Dili, 31/05/2020: Bazeia ba Decreto do Presidente da República no.35/2020, 27 de maio, ne’ebé autoriza estensaun ba Estadu Emerjénsia ba datoluk, Ministério da Educação, Juventude e Desporto sei prepara detalle sira kona-ba reativasaun prosesu aprendizajen prezensiál.

Ministério da Educação, Juventude e Desporto hakarak hato’o ba dirijente, profesór, inan-aman, estudante no komunidade edukativu hotu iha territóriu Timor-Leste laran tomak katak:

MEJD sei hato’o loron hahú prosesu aprendizajen prezensiál, bainhira Ministério da Saúde aprova ona padraun implementasaun prevensaun COVID-19 iha eskola sira hotu.

Hahú loron 1 fulan-juñu 2020, MEJD husu ba diretór, koordenadór, profesór, estudante no komunidade edukativa sira hotu atu hahú halo limpeza iha ida-ida nia eskola hanesan limpeza ba sala-de-aula sira no resintu eskolár. Husu atu mantein regra jerál MdS nian kona-ba uza máskara no prátika ijiene nian.

Atu prevene hada’et COVID 19, eskola sira tenke prepara fasilidade fase-liman hanesan bee no sabaun atu estudante sira hotu bele iha asesu molok tama sala-de-aula, durante tempu halimar no atividade sira seluk.

Husu ba eskola sira atu jere osan subsídiu eskolár atu prepara fasilidade ijiene báziku iha eskola sira.

Hahú loron 1, fulan-juñu 2020, MEJD husu ba diretór, koordenadór no profesór sira hotu atu halo preparasaun didi’ak ba atividade edukativu sira relasiona ho prosesu aprendizajen prezensiál, inklui organiza no kria material didátiku sira, atu nune’e bainhira eskola loke fali prosesu ensinu-aprendizajen bele la’o ho efetivu.

MdS no MEJD sei halo supervisaun ba eskola sira atu garante katak eskola sira prenxe duni padraun no kritériu sira kona-ba prevensaun hada’et COVID-19.

MEJD liuhusi INFORDEPE sei providensia formasaun obrigatóriu ba profesór no dirijente eskola sira kona-ba COVID-19. Formasaun ne’e sei disponivel online no ho ajuda prezensiál. Formasaun ne’e sei hahú loron 1- 15 juñu 2020.

Mak ne’e de’it, sekarik presiza klarifikasaun ruma bele hakbesik ba Diresaun Edukasaun Munisipál sira. -Remata-

Imprimir