Dili,10/8/2020 - Ekipa ADTL Sr. Cesario da Silva Diretór Exekutivo ho nia komitiva relata preokupasaun importante haat iha seitor edukasasun ba Ministro Edukasaun Juventude no Desportu atu konsidera iha planu prioritariu MEJD nian.

Iha biban ne'e Diretór Exekutivo ho nia komitiva hato'o mos sira nia preokupasaun no nesesidade ne'ebé maka importante ba EhD ( ema ho defisiensia ) durante ne'e sira hasoru. Pontos importante haat ne'e mak hanesan;

1. Ezame ekivalénsia nivel sekundáriu ba ema ho defisiénsia.

2. Dezenvolve lian jestual nasionál ba komunidade defisiénsia tilun.

3. Formasaun profesores.

4. Asesibilidade fiziku hodi garante EhD nia partisipasaun iha seitor edukasaun públiko.

Iha biban ida ne'e Sua.Exia Ministro Edukasaun Joventude no Desportu Dr.Armindo Maia mos hato'o katak MEJD laos deit atu tau matan ba ema ne'ebé maka ho fízika kompletu maibe tau matan mos ba ema ho defisiente. Hahu kedas tinan hirak liu ba kotuk MEJD hatama ona ninia politika Edukasaun "Inkluziva" ne katak atu halo edukasaun nakloke ba ema houto-houto isin tomak ka defisiente. Iha mos problema no dezafiu barak hanesan fasilidade fizika Ne'ebé bele permite ba maluk defisiente sira atu uza. Ida ne'e presija halo arkitetura foun , fasilidade foun, rampa no seluk tan. Maibe neneik ita mos sei to'o iha ne'ebá. Iha mos dezafiu kona ba rekursu umano, ne'ebé tradus lian jestual, braile no seluk tan. Ita agora iha deit ema nain tolu ou haat, ita tenke investe ba ida ne'e. Laos deit MEJD maibe mos ba Ministério sira seluk Ne'ebé maka relevante. Defisiente iha Timor laran tomak kuaze rihun tolu nulu resin rua e entre sira ne'e, rihun rua nulu resin lima maka laiha asesu ba edukasaun. Tamba ne'e maka ohin enkontro ami koko koalia atu hare no resolve.

#Mídia Gab_Min_1082020

Bobonaro, 7/8/2020 – Ministru Edukasaun, Juventude no Desportu, Dr. Armindo Maia iha sexta-feira ne’e desloka ba Munisípiu Bobonaro hodi asiste inaugurasaun "Sistema Bee moos uza bomba Elektrika" iha suco Marobo, Soilesu, Atu-Aben, Ilat-Laun, Bobonaro, ne’ebé hetan apoiu hosi KOIKA no UNDP Timor-Leste servisu hamutuk ho Ministériu Obras Públika/SAS no Ministériu Estatal. Iha oportunidade ne'e, Sua. Exia. Ministru Edukasaun, Juventude no Desportu ne’ebé akompaña hosi xefe Gabinete,DG Plano e Politica no DN.Infrastrutura halo mós vizita ba eskola kona-ba Formasaun profesór sira ka " Baixarelatu", ESTV Malibaca Yamato maliana, ESTV Maumali no EBF Manu Aman.

Iha vizita ba eskola sira ne’e, Ministru Edukasaun, Juventude no Desportu ka’olia direta ho Profesór no alunu sira hodi rona sira nia problema no difikuldade ne’ebé maka sira enfrenta durante ne’e. Tuir observasaun, prosesu aprendizajen hahú ona no eskola sira nafatin implementa regras prevensaun ba COVID-19 nian ne’ebé mak fó sai hosi Ministériu Saude.

Ministru Edukasaun, Juventude no Desportu halo mós enkontru ho alunu sira hosi Ensinu Sekundáriu Tékniku Vokasionál (ESTV) Maumali. Iha enkontru ne’e, Bruder Marçal Lopes, Sdb nu’udar diretór eskola hateten katak prezensa Ministru Edukasaun, Juventude no Desportu iha ESTV Maumali fó motivasaun boot ba estudante sira, atu sira la sente mesak. Motivasaun hosi prezensa Sua. Exia. Ministru ne’e hakbi’it tebes estudante no profesór sira iha eskola refere. Bruder Marçal Lopes, Sdb hatutan tan katak, maske iha eskola profesór sira enfrenta difikuldade kona-ba pontualidade, kapasidade alunu sira ne’ebé lahanesan atu absorve materia sira, maibé dirijente ESTV Maumali buka nafatin dalan atu bele hasa’e kapasidade sira tuir padraun edukasaun nian.

Iha fatin hanesan Ministru Edukasaun, Juventude no Desportu mós fó lia menon no motivasaun ba estudante sira atu aproveita didiak oportunidade ne’ebé sira hetan atu labele halimar hodi lakon tempu deit, maibé aproveita didiak oportunidade ida ne’e tamba eskola ne’e gratuitu. Totál alunu ne’ebé mak iha eskola refere hamutuk 108 husi primeiru to'o terseiru ano.

#Mídia Gab.Mim070820