Previous Next

VISE-MINISTRU EDUKASAUN, JUVENTUDE NO DESPORTU HALA'O INAGURASAUN BA EBF SARIN IHA MUNISÍPIU MANUFAHI

Manufahi, 24/07/2020 - S. Exa Vise- Ministru Edukasaun, Juventude no Desportu Dr. António Guterres inagura EBF Sarin iha suku Dotic, Postu Administrativu Alas, Munisipiu Manufahi. Eskola ne'e harii liuhosi Programa Nasionál Dezenvolvimentu Suku (PNDS) ho total orsamentu hamutuk $ 62,752.57.

Antes ba hala'o inagurasaun, Vise-Ministru hasoru malu uluk ho Prezidente Autoridade Munisipiu Manufahi Interinu no Komandante Polisia Munisipiu Manufahi hodi informa atividade servisu no mos husu kolaborasaun servisu diak ba iha area edukasaun nian.

EBF Sarin iha profesór hamutuk na'in 3, profesór kontratadu na'in 2 no permanente na'in 1 ho total sala hamutuk 3 ho total estudante na'in 52.

" Ha'u apresia servisu Ministra no Vise-Ministru Sesante, tanba ho sira nia esforsu mak ohin loron ha'u bele mai marka istoria iha fatin ida ne'e hodi halo inagurasaun ba EBF Sarin. Ha'u iha esperansa katak eskola ne'e sei sai buras liu tan hanesan we matan ne'ebe sulin, tanba eskola ne'e la'os hari'i ho osan maibé hari'i ho domin. Tanba ne'e hau fiar katak eskola ne'e sei hahoris jerasaun foun ho kualidade diak iha futuru" haktuir Dr. António iha ninia diskursu.

Iha seremónia ne'e mos, lia nain sira agradese ba Vise-Ministru ne'ebé ho komitiva hiit-an too iha fatin ida ne'e. Maske ho lokalizasaun dook ho estrada ne'ebé la diak maibé ho pasiensia no domin, governante ne'e primeira ves marka istoria foun hodi to'o duni iha fatin ne'e.

HOTU

#MídiaGVMEJD


Imprimir   Email