Previous Next

VISE-MINISTRU EDUKASAUN, JUVENTUDE NO DESPORTU HALA'O ENKONTRU HO ADIDU EDUKASAUN NO KULTURA INDONÉZIA

Díli, 30/07/2020- S. Exa Vise-Ministru Edukasaun, Juventude no Desportu Dr. António Guterres iha nia servisu fatin simu vizita hosi Exmo Achmad Tavip Syah hanesan Adidu Edukasaun no Kultura Indonézia.

Adidu Edukasaun no Kultura hanesan reprezentante Ministériu Edukasaun no Kultura Indonézia no to'o Díli iha 3 Fevereiru 2020 mak nudar oportunidade atu fo koñese-an no atu diskute detaillu ba programa sira iha area edukasaun durante ne'e no planu ba oin.

Durante enkontru, Vise-Ministru aprezenta katak hanesan bolseiru Programa Darmasiswa iha 2005 no prontu koopera ho parte Indonézia hodi reforsa tan programa sira ne'ebé lao ona. Vise-Ministru husu atu fasilita estudante sekundáriu no universitáriu hanesan iha emisaun permisaun estudu/ijin belajar, sertifikasaun lian-Indonéziu ba estudante sira atu kontinua estudu inklui ba kursu lian-Indonézia iha nivel munisipal nune'e mos posibilidade bolsu estudu ba nivel sekundáriu sira.

Aliende ne'e, husu mos atu la'os konsentra iha lian-Indonézia deit maibé mos reforsa kapasitasaun iha arte ba estudante sira. Hosi parte Adidu kontente tebes ho enkontru ne'e sei aprezenta fali planu ho programa sira enkontru sira tuir mai.

Programa sira ne'ebé lao hela hanesan Programa Bolsu Estudu Darmasiswa kada tinan fo ba Timor oan atu ba eskola Indonézia no programa BIPA (Bahasa Indonesia bagi Punutur Asing) ne'ebé iha Pusat Budaya Indonesia no iha universidade balun iha kapital maibé tanba surtu pandemia COVID-19 paradu hela.

HOTU

#MídiaGVMEJD


Imprimir   Email