Previous Next

"VISÉ MINISTRU EDUKASAUN JOVENTUDE DISPORTU INAGURA ESKOLA PRIMÁRIA FILIAL SADAN SARIN"

Visé Ministru Edukasaun Joventude Desportu Sesta-feira (24/07) inagura uma eskola primária Sandan Sarin Suku Dotik Postu Administrativu Alas ne'ebé gasta orsamentu dollar Amérikanu ($ 62,752.57) liu husi Programa Nasionál Dezenvolvimentu Suku (PNDS).

Xéfi Departementu Monitorizasaun no Avaliasaun PNDS Filipe Cardoso Viera ne'ebé reprezentante Diretora PNDS relata katak kontrusaun uma eskola Sarin hahú realiza iha tinan 2019, no alokasaun orsamentu ba obra ne'e ho montante dollar Amérikanu rihun nén-nulu resin-rua atus hitu lima-nulu resin-rua pontu lima-nulu resin-hitu ($62,752.57), husi total orsamentu ne'e, fahe ba fundus operasionál ho total ($3,000.00), no fundus infrastutura ho total ($59,757,57) fahe ba parte rua kompostu selu traballadór ($ 10,000.00) no material konstruksaun ($ 49,257.57), husi fundus infrastruktura nian ekipa jestór PNDS Suku Dotik konsege jere diak hodi finaliza uma iskola sala tolu,kompleta azulesu,sintina,meza kadeira inklui kuadrus eskrita maske la preve orsamentu ba meza kadeira,sintina no kuadrus eskrita.

Filipe Cardoso Viera fó agrades ba komunidade inan aman no ekipa jestór PNDS suku ne'ebé kontribui maka'as hodi finaliza obra ne'e.

Fatin hanesan Xéfi Suku Dotik Sebastião da Costa Amaral agradese ba Ministériu Estatal ho Ministériu Edukasaun konsege harí ona eskola permanenti ida iha aldeia Sarin ho kualidade maibe problema ne'ebé komunidade hasoru maka la iha bee mos, eletrisidade, estrada no komunidade hetan ameasa husi mota klere.

Nune'e mós Viriato Seac reprezentante komunidade no fukun bo'ot lima iha Sarin hato'o agradese wa'in ba governu bele hari eskola ne'e, tanba eskola ne'e harí inisiativa rasik husi komunidade Sarin iha tinan 2001 uza uma ex.pos Babinsa militár Indonézia nian no inan aman lalin au taka provizori hodi halo prosesu aprendisajem.

Viriato mós agradese ba governante sira durante Timor Leste ukun an foin primeira vés Visé Ministru Edukasaun halo vizita ba aldeia Sarin ne'ebe dook husi Suku Dotik.

Responde ba asuntu ne'e Visé Ministru Edukasaun António Guterres hateten eskola Sarin sai bee matan ba jerasaun foun sira tanba eskola ne'e harí ho domin husi Sarin oan sira, husi eskola ne'e sei hahoris lider di'ak iha nasaun Timor Leste, tanba ne'e tenki kuidadu obra ne'e hodi hala'o prosesu aprendizajêm.

Relasiona ho preukupasaun Xefi Suku Dotik nian kona ba problema bee mos, estrada, eletrisidade, mota klere ameasa komunidade sira inklui fasilidade eskola nian balun sei menus, Visé Ministru Edukasaun husu Xéfi Suku atu halo proposta hodi aprezenta ba ninia gabineti hodi buka solusaun, kona ba meza kadeira parte eduksaun iha tempu badak sei distribui meza kadeira 75 ba eskola Sarin.

Entretantu iha inagurasaun ne'e Visé Ministru Edukasaun mós entrega fasilidade prevensaun covid-19 ba eskola Sarin hanesan termus scan ida, tanki desenfekta balde inklui fasilidade sira seluk.(Jugu)


Imprimir   Email