Previous Next

SUA EXIA. MINÍSTRO EDUKASAUN JUVENTUDE DESPORTO APRESIA HO SERVISU GIZ (The Deutsche Gesellschaft für Internationale Zusammenarbeit (GIZ) GmbH) LIU HUSI PROJETU ENDIGO

Dili, 16/ 8 / 2020 – Country Director GIZ Sr. Reiner Schellhaas agradese ba parseria no koperasaun dia’k ho MEJD durante ne’e, no GIZ kompremete atu kontinua supporta MEJD iha área Ensinu Sekundáriu Tékniku Vokasional liuliu kona-ba dezenvolvimentu kurríkulu ne’ebé inovativu no di’ak liu iha futuru. GIZ mos agradese katak, Sua.Exia Ministru, hatan ona no iha tempu besik sei asina MoU ida iha área refere. Ne'e mak pontos Importante ne'ebe aprenzenta husi Country Director GIZ ba Sua.Exia Minístro Edukasaun Juventude e Desporta iha sira nia vizita.
Sr. Reiner Schellhaas ne'e mos esplika liu tan GIZ ho MEJD, hamosu ona kurríkulu innovativu balun iha tinan hirak ba kotuk hamutuk ho Ensinu Sekundáriu Tékniku Vokasional balun liuliu iha parte leste mak hanesan iha Munisípiu haat ; Baucau, Manatuto, Lautém no Viqueque. No mos Projetu Agrofloresta implementa iha Munisípiu haat ho ninia tarjetu atu kuda ai ho montante Milaun 3 no iha suco 40.
GIZ hare katak, topiku Agrofloresta importante tebes atu bele entegra iha kurríkulu Ensinu Sekundáriu Tékniku Vokasional nian, maibe to’o agora seidauk, tanba ne’e, sira iha hanoin atu oinsá bele entegra topiku refere iha kurríkulu Ensinu Sekundáriu Tékniku Vokasional nian liuliu Tékniku Vokasional ne’ebé adere ba MEJD. GIZ komesa ona sira nian servisu iha asuntu refere no hala’o atividade sira mak hanesan;
-Kria to’os ba aprendizagem agroflorestal (Agroforestry Learning Plot),
-Expertu ka trabalhador ba Dezenvolvimentu ida (Development worker) ne’ebé koloka hodi servisu iha área refere,
-Expertu ne’e halo akonsellamentu ba tékniku vokasional agrícola sira atu hadi’ak liu tan métodu no konteúdu ensinu nian ne’ebé hare liu ba sistema agrofloresta espesialmente através aprendizajen prátika sira,
-Kompleta ou halo revizaun atu bele hadia’k liu tan kurríkulu Ensinu nian no materia didátiku no métodu sira ne’ebé iha.
Aleinde topiku agrofloresta ne’ebé temi iha leten, GIZ mos iha hanoin entegra Sistema Dijitalizasaun iha prosesu aprendizajen ne’e. Sistema refere sei iha hanoin atu bele komesa iha Novenbru tinan ne’e. Sistema Dijitalizasaun iha prosesu apredizajen ne’ebé mensiona mak hanesan uza smartphone. Xefe ne'e mos informa liu tan MoU prepara ona no prontu ba diskusaun.
Iha biban ida ne'e Koordenador Projetu ENDIGO, Dr. Theo Ebbers, mos hatutan tan katak, durante ne’e GIZ liu hosi Projetu ENDIGO halo ona parseria servisu di’ak mos ho MEJD liuliu iha área Ensinu Sekundáriu Tékniku Vokasional. Iha parseria servisu ne’e, Projetu apoiu ona Tékniku Vokasional balun iha Munisípiu Lospalos no Viqueque, apoiu refere halai liu ba kapasitasaun sira mak hanesan hasa’e abilidade no koñesimentu no fó mos akonsellamentu ba alunu tékniku vokasional sira hodi bele orienta ba merkadu servisu nian. Projetu refere halo parseria di’ak ho INFORDEPE liuliu iha programa ensinu nian no produs mos manual ba hanorin. Projetu ne’e mos apoiu sentru juventude sira iha teritóriu, no apoiu mos Associação Deficientes de Timor-Leste (ADTL).
Iha biban ikus nian Sua.Exia Ministru Edukasaun, Juventude no Desportu apresia tebes parseria hamutuk GIZ Timor-Leste. Sua.Exia. Ministru hatutan tan katak, MEJD iha 24 Ensinu Sekundáriu Tékniku Vokasional. Kapasidade hosi Ensinu Sekundáriu Tékniku Vokasional minímu tebes tantu professor no rekursu. Razaun ida mak Ensinu Sekundáriu Tékniku Vokasional sira barak mak konversaun hosi Ensino Sekundáriu Jeral. Hasa’e kapasidade iha àrea refere mak programa prioridade ida hosi governu ida ne’e nian.
Sua.Exia. Ministru hatutan tan katak, setór agrikultura importante tebes, hanesan ita hotu hatene katak, agora dadaun governu halo hela programa ba rekopera ekonomia rai-laran, no setor ida ne’e hanesan setor importante tebes. Iha MEJD, aliñamentu ho programa merenda escolar ou ‘School Feeding Programme’, kuaze 300,000 alunu sira hetan merenda iha lor-loron. Aleinde ne’e SE. Ministru hatutan tan katak, Nasaun Alemaña koñesidu tebes ho ninian teknolojia ne’ebé avansadu tebes, hare ba topiku dijitalizasaun hanoin ne’e pasu di’ak idaba dezenvolvimentu setor Edukasaun iha Timor-Leste. Ikus Sua.Exia. Ministru mos hakarak hatene tanba sa mak GIZ impelmenta programa iha deit iha Parte Leste, iha Munisípiu haat; Baucau, Manatuto, Lautém no Viqueque. ?
Hatan ba perguntas Sua.Exia. Ministru nian ne'e, Sr. Reiner hatete katak, ida ne’e iha ona konkordansia antes entre governu rua ne’e. Maibé, alen de ida ne'e, iha mos programa iha setor agrikultura, no mos projetu seluk hanesan projetu iha Setor Maritima, liuliu iha àrea kapasitasaun nian.
Ikus Liu Sua.Exia. Ministru husu atu GIZ mos fo apoio ba eskola tekniku vokasional ida ka rua ne'ebé laos deit iha parte leste maibe dezenvolve liu tan Ensinu Sekundário Tekniku Vokasional ida ka rua nune'e bele sai Ensinu Exemplar ida iha Timor-Leste.
Enkontro ne'ebé partesipa mos husi Sekretaria Ezekutiva hamosu pontos importanete mak hanesan; MoU kona-ba Agrofloresta nian ba Ensinu Sekundáriu Tékniku Vokasional, MoU ne’e tuir planu sei asina iha loron 28 Agostu 2020, No halo diskusaun MoU kona-ba ideia dijitalizasaun iha prosesu aprendizajen nian.

Imprimir   Email